Read כֶּתֶר אֲרָם צוֹבָא - Tanah Aleppo Codex תהלים 135 Bible Online

תהלים 135 - כֶּתֶר אֲרָם צוֹבָא - Tanah Aleppo Codex bible

תהלים 135

¹א הללו-יה הללו את-שם יהוה הללו עבדי יהוה

²ב שעמדים בבית יהוה-- בחצרות בית אלהינו

³ג הללו-יה כי-טוב יהוה זמרו לשמו כי נעים

⁴ד כי-יעקב בחר לו יה ישראל לסגלתו

⁵ה כי אני ידעתי כי-גדול יהוה ואדנינו מכל-אלהים

⁶ו כל אשר-חפץ יהוה עשה בשמים ובארץ-- בימים וכל-תהמות

⁷ז מעלה נשאים מקצה הארץ ברקים למטר עשה מוצא-רוח מאוצרותיו

⁸ח שהכה בכורי מצרים-- מאדם עד-בהמה

⁹ט שלח אותת ומפתים--בתוככי מצרים בפרעה ובכל-עבדיו

¹⁰י שהכה גוים רבים והרג מלכים עצומים

¹¹יא לסיחון מלך האמרי ולעוג מלך הבשן ולכל ממלכות כנען

¹²יב ונתן ארצם נחלה-- נחלה לישראל עמו

¹³יג יהוה שמך לעולם יהוה זכרך לדר-ודר

¹⁴יד כי-ידין יהוה עמו ועל-עבדיו יתנחם

¹⁵טו עצבי הגוים כסף וזהב מעשה ידי אדם

¹⁶טז פה-להם ולא ידברו עינים להם ולא יראו

¹⁷יז אזנים להם ולא יאזינו אף אין-יש-רוח בפיהם

¹⁸יח כמוהם יהיו עשיהם-- כל אשר-בטח בהם

¹⁹יט בית ישראל ברכו את-יהוה בית אהרן ברכו את-יהוה

²⁰כ בית הלוי ברכו את-יהוה יראי יהוה ברכו את-יהוה

²¹כא ברוך יהוה מציון-- שכן ירושלם הללו-יה