Read כֶּתֶר אֲרָם צוֹבָא - Tanah Aleppo Codex תהלים 139 Bible Online

תהלים 139 - כֶּתֶר אֲרָם צוֹבָא - Tanah Aleppo Codex bible

תהלים 139

¹א למנצח לדוד מזמור יהוה חקרתני ותדע

²ב אתה ידעת שבתי וקומי בנתה לרעי מרחוק

³ג ארחי ורבעי זרית וכל-דרכי הסכנתה

⁴ד כי אין מלה בלשוני הן יהוה ידעת כלה

⁵ה אחור וקדם צרתני ותשת עלי כפכה

⁶ו פלאיה (פליאה) דעת ממני נשגבה לא-אוכל לה

⁷ז אנה אלך מרוחך ואנה מפניך אברח

⁸ח אם אסק שמים שם אתה ואציעה שאול הנך

⁹ט אשא כנפי-שחר אשכנה באחרית ים

¹⁰י גם-שם ידך תנחני ותאחזני ימינך

¹¹יא ואמר אך-חשך ישופני ולילה אור בעדני

¹²יב גם-חשך לא-יחשיך ממך ולילה כיום יאיר-- כחשיכה כאורה

¹³יג כי-אתה קנית כליתי תסכני בבטן אמי

¹⁴יד אודך-- על כי נוראות נפליתי נפלאים מעשיך ונפשי ידעת מאד

¹⁵טו לא-נכחד עצמי ממך אשר-עשיתי בסתר רקמתי בתחתיות ארץ

¹⁶טז גלמי ראו עיניך ועל-ספרך כלם יכתבו ימים יצרו ולא (ולו) אחד בהם

¹⁷יז ולי--מה-יקרו רעיך אל מה עצמו ראשיהם

¹⁸יח אספרם מחול ירבון הקיצתי ועודי עמך

¹⁹יט אם-תקטל אלוה רשע ואנשי דמים סורו מני

²⁰כ אשר ימרוך למזמה נשוא לשוא עריך

²¹כא הלוא-משנאיך יהוה אשנא ובתקוממיך אתקוטט

²²כב תכלית שנאה שנאתים לאויבים היו לי

²³כג חקרני אל ודע לבבי בחנני ודע שרעפי

²⁴כד וראה אם-דרך-עצב בי ונחני בדרך עולם