Read כֶּתֶר אֲרָם צוֹבָא - Tanah Aleppo Codex תהלים 143 Bible Online

תהלים 143 - כֶּתֶר אֲרָם צוֹבָא - Tanah Aleppo Codex bible

תהלים 143

¹א מזמור לדוד יהוה שמע תפלתי-- האזינה אל-תחנוני באמנתך ענני בצדקתך

²ב ואל-תבוא במשפט את-עבדך כי לא-יצדק לפניך כל-חי

³ג כי רדף אויב נפשי-- דכא לארץ חיתי הושבני במחשכים כמתי עולם

⁴ד ותתעטף עלי רוחי בתוכי ישתומם לבי

⁵ה זכרתי ימים מקדם-- הגיתי בכל-פעלך במעשה ידיך אשוחח

⁶ו פרשתי ידי אליך נפשי כארץ-עיפה לך סלה

⁷ז מהר ענני יהוה-- כלתה רוחי אל-תסתר פניך ממני ונמשלתי עם-ירדי בור

⁸ח השמיעני בבקר חסדך-- כי-בך בטחתי הודיעני דרך-זו אלך-- כי-אליך נשאתי נפשי

⁹ט הצילני מאיבי יהוה-- אליך כסתי

¹⁰י למדני לעשות רצונך-- כי-אתה אלוהי רוחך טובה תנחני בארץ מישור

¹¹יא למען-שמך יהוה תחיני בצדקתך תוציא מצרה נפשי

¹²יב ובחסדך תצמית איבי והאבדת כל-צררי נפשי--כי אני עבדך