Read כֶּתֶר אֲרָם צוֹבָא - Tanah Aleppo Codex תהלים 144 Bible Online

תהלים 144 - כֶּתֶר אֲרָם צוֹבָא - Tanah Aleppo Codex bible

תהלים 144

¹א לדוד ברוך יהוה צורי-- המלמד ידי לקרב אצבעותי למלחמה

²ב חסדי ומצודתי משגבי ומפלטי-לי מגני ובו חסיתי הרודד עמי תחתי

³ג יהוה--מה-אדם ותדעהו בן-אנוש ותחשבהו

⁴ד אדם להבל דמה ימיו כצל עובר

⁵ה יהוה הט-שמיך ותרד גע בהרים ויעשנו

⁶ו ברוק ברק ותפיצם שלח חציך ותהמם

⁷ז שלח ידיך ממרום פצני והצילני ממים רבים מיד בני נכר

⁸ח אשר פיהם דבר-שוא וימינם ימין שקר

⁹ט אלהים--שיר חדש אשירה לך בנבל עשור אזמרה-לך

¹⁰י הנותן תשועה למלכים הפוצה את-דוד עבדו--מחרב רעה

¹¹יא פצני והצילני מיד בני-נכר אשר פיהם דבר-שוא וימינם ימין שקר

¹²יב אשר בנינו כנטעים-- מגדלים בנעוריהם בנותינו כזוית-- מחטבות תבנית היכל

¹³יג מזוינו מלאים-- מפיקים מזן אל-זן צאוננו מאליפות מרבבות-- בחוצותינו

¹⁴יד אלופינו מסבלים אין-פרץ ואין יוצאת ואין צוחה ברחבתינו

¹⁵טו אשרי העם שככה לו אשרי העם שיהוה אלהיו