Read כֶּתֶר אֲרָם צוֹבָא - Tanah Aleppo Codex תהלים 145 Bible Online

תהלים 145 - כֶּתֶר אֲרָם צוֹבָא - Tanah Aleppo Codex bible

תהלים 145

¹א תהלה לדוד ארוממך אלוהי המלך ואברכה שמך לעולם ועד

²ב בכל-יום אברכך ואהללה שמך לעולם ועד

³ג גדול יהוה ומהלל מאד ולגדלתו אין חקר

⁴ד דור לדור ישבח מעשיך וגבורתיך יגידו

⁵ה הדר כבוד הודך-- ודברי נפלאתיך אשיחה

⁶ו ועזוז נוראתיך יאמרו וגדלותיך (וגדלתך) אספרנה

⁷ז זכר רב-טובך יביעו וצדקתך ירננו

⁸ח חנון ורחום יהוה ארך אפים וגדל-חסד

⁹ט טוב-יהוה לכל ורחמיו על-כל-מעשיו

¹⁰י יודוך יהוה כל-מעשיך וחסידיך יברכוכה

¹¹יא כבוד מלכותך יאמרו וגבורתך ידברו

¹²יב להודיע לבני האדם--גבורתיו וכבוד הדר מלכותו

¹³יג מלכותך מלכות כל-עלמים וממשלתך בכל-דור ודר

¹⁴יד סומך יהוה לכל-הנפלים וזוקף לכל-הכפופים

¹⁵טו עיני-כל אליך ישברו ואתה נותן-להם את-אכלם בעתו

¹⁶טז פותח את-ידך ומשביע לכל-חי רצון

¹⁷יז צדיק יהוה בכל-דרכיו וחסיד בכל-מעשיו

¹⁸יח קרוב יהוה לכל-קראיו-- לכל אשר יקראהו באמת

¹⁹יט רצון-יראיו יעשה ואת-שועתם ישמע ויושיעם

²⁰כ שומר יהוה את-כל-אהביו ואת כל-הרשעים ישמיד

²¹כא תהלת יהוה ידבר-פי ויברך כל-בשר שם קדשו--לעולם ועד