Read כֶּתֶר אֲרָם צוֹבָא - Tanah Aleppo Codex תהלים 147 Bible Online

תהלים 147 - כֶּתֶר אֲרָם צוֹבָא - Tanah Aleppo Codex bible

תהלים 147

¹א הללו-יה כי-טוב זמרה אלהינו-- כי-נעים נאוה תהלה

²ב בונה ירושלם יהוה נדחי ישראל יכנס

³ג הרפא לשבורי לב ומחבש לעצבותם

⁴ד מונה מספר לכוכבים לכלם שמות יקרא

⁵ה גדול אדונינו ורב-כח לתבונתו אין מספר

⁶ו מעודד ענוים יהוה משפיל רשעים עדי-ארץ

⁷ז ענו ליהוה בתודה זמרו לאלהינו בכנור

⁸ח המכסה שמים בעבים-- המכין לארץ מטר המצמיח הרים חציר

⁹ט נותן לבהמה לחמה לבני ערב אשר יקראו

¹⁰י לא בגבורת הסוס יחפץ לא-בשוקי האיש ירצה

¹¹יא רוצה יהוה את-יראיו-- את-המיחלים לחסדו

¹²יב שבחי ירושלם את-יהוה הללי אלהיך ציון

¹³יג כי-חזק בריחי שעריך ברך בניך בקרבך

¹⁴יד השם-גבולך שלום חלב חטים ישביעך

¹⁵טו השלח אמרתו ארץ עד-מהרה ירוץ דברו

¹⁶טז הנתן שלג כצמר כפור כאפר יפזר

¹⁷יז משליך קרחו כפתים לפני קרתו מי יעמד

¹⁸יח ישלח דברו וימסם ישב רוחו יזלו-מים

¹⁹יט מגיד דברו ליעקב חקיו ומשפטיו לישראל

²⁰כ לא עשה כן לכל-גוי-- ומשפטים בל-ידעום הללו-יה