Read כֶּתֶר אֲרָם צוֹבָא - Tanah Aleppo Codex תהלים 17 Bible Online

תהלים 17 - כֶּתֶר אֲרָם צוֹבָא - Tanah Aleppo Codex bible

תהלים 17

¹א תפלה לדוד שמעה יהוה צדק-- הקשיבה רנתי האזינה תפלתי בלא שפתי מרמה

²ב מלפניך משפטי יצא עיניך תחזינה מישרים

³ג בחנת לבי פקדת לילה-- צרפתני בל-תמצא זמתי בל-יעבר-פי

⁴ד לפעלות אדם בדבר שפתיך-- אני שמרתי ארחות פריץ

⁵ה תמך אשרי במעגלותיך בל-נמוטו פעמי

⁶ו אני-קראתיך כי-תענני אל הט-אזנך לי שמע אמרתי

⁷ז הפלה חסדיך מושיע חוסים-- ממתקוממים בימינך

⁸ח שמרני כאישון בת-עין בצל כנפיך תסתירני

⁹ט מפני רשעים זו שדוני איבי בנפש יקיפו עלי

¹⁰י חלבמו סגרו פימו דברו בגאות

¹¹יא אשרינו עתה סבבוני (סבבונו) עיניהם ישיתו לנטות בארץ

¹²יב דמינו--כאריה יכסוף לטרף וככפיר ישב במסתרים

¹³יג קומה יהוה-- קדמה פניו הכריעהו פלטה נפשי מרשע חרבך

¹⁴יד ממתים ידך יהוה ממתים מחלד-- חלקם בחיים וצפינך (וצפונך) תמלא בטנם ישבעו בנים-- והניחו יתרם לעולליהם

¹⁵טו אני--בצדק אחזה פניך אשבעה בהקיץ תמונתך