Read כֶּתֶר אֲרָם צוֹבָא - Tanah Aleppo Codex תהלים 22 Bible Online

תהלים 22 - כֶּתֶר אֲרָם צוֹבָא - Tanah Aleppo Codex bible

תהלים 22

¹א למנצח על-אילת השחר מזמור לדוד

²ב אלי אלי למה עזבתני רחוק מישועתי דברי שאגתי

³ג אלהי--אקרא יומם ולא תענה ולילה ולא-דמיה לי

⁴ד ואתה קדוש-- יושב תהלות ישראל

⁵ה בך בטחו אבתינו בטחו ותפלטמו

⁶ו אליך זעקו ונמלטו בך בטחו ולא-בושו

⁷ז ואנכי תולעת ולא-איש חרפת אדם ובזוי עם

⁸ח כל-ראי ילעגו לי יפטירו בשפה יניעו ראש

⁹ט גל אל-יהוה יפלטהו יצילהו כי חפץ בו

¹⁰י כי-אתה גחי מבטן מבטיחי על-שדי אמי

¹¹יא עליך השלכתי מרחם מבטן אמי אלי אתה

¹²יב אל-תרחק ממני כי-צרה קרובה כי-אין עוזר

¹³יג סבבוני פרים רבים אבירי בשן כתרוני

¹⁴יד פצו עלי פיהם אריה טרף ושאג

¹⁵טו כמים נשפכתי-- והתפרדו כל-עצמותי היה לבי כדונג נמס בתוך מעי

¹⁶טז יבש כחרש כחי ולשוני מדבק מלקוחי ולעפר-מות תשפתני

¹⁷יז כי סבבוני כלבים עדת מרעים הקיפוני כארי ידי ורגלי

¹⁸יח אספר כל-עצמותי המה יביטו יראו-בי

¹⁹יט יחלקו בגדי להם ועל-לבושי יפילו גורל

²⁰כ ואתה יהוה אל-תרחק אילותי לעזרתי חושה

²¹כא הצילה מחרב נפשי מיד-כלב יחידתי

²²כב הושיעני מפי אריה ומקרני רמים עניתני

²³כג אספרה שמך לאחי בתוך קהל אהללך

²⁴כד יראי יהוה הללוהו-- כל-זרע יעקב כבדוהו וגורו ממנו כל-זרע ישראל

²⁵כה כי לא-בזה ולא שקץ ענות עני-- ולא-הסתיר פניו ממנו ובשועו אליו שמע

²⁶כו מאתך תהלתי בקהל רב--נדרי אשלם נגד יראיו

²⁷כז יאכלו ענוים וישבעו-- יהללו יהוה דרשיו יחי לבבכם לעד

²⁸כח יזכרו וישבו אל-יהוה-- כל-אפסי-ארץ וישתחוו לפניך כל-משפחות גוים

²⁹כט כי ליהוה המלוכה ומשל בגוים

³⁰ל אכלו וישתחוו כל-דשני-ארץ-- לפניו יכרעו כל-יורדי עפר ונפשו לא חיה

³¹לא זרע יעבדנו יספר לאדני לדור [ (Psalms 22:32) לב יבאו ויגידו צדקתו לעם נולד כי עשה ]