Read כֶּתֶר אֲרָם צוֹבָא - Tanah Aleppo Codex תהלים 31 Bible Online

תהלים 31 - כֶּתֶר אֲרָם צוֹבָא - Tanah Aleppo Codex bible

תהלים 31

¹א למנצח מזמור לדוד

²ב בך-יהוה חסיתי אל-אבושה לעולם בצדקתך פלטני

³ג הטה אלי אזנך-- מהרה הצילני היה לי לצור-מעוז--לבית מצודות להושיעני

⁴ד כי-סלעי ומצודתי אתה ולמען שמך תנחני ותנהלני

⁵ה תוציאני--מרשת זו טמנו לי כי-אתה מעוזי

⁶ו בידך אפקיד רוחי פדית אותי יהוה--אל אמת

⁷ז שנאתי השמרים הבלי-שוא ואני אל-יהוה בטחתי

⁸ח אגילה ואשמחה בחסדך אשר ראית את-עניי ידעת בצרות נפשי

⁹ט ולא הסגרתני ביד-אויב העמדת במרחב רגלי

¹⁰י חנני יהוה כי צר-לי עששה בכעס עיני נפשי ובטני

¹¹יא כי כלו ביגון חיי-- ושנותי באנחה כשל בעוני כחי ועצמי עששו

¹²יב מכל-צררי הייתי חרפה ולשכני מאד-- ופחד למידעי ראי בחוץ-- נדדו ממני

¹³יג נשכחתי כמת מלב הייתי ככלי אבד

¹⁴יד כי שמעתי דבת רבים-- מגור מסביב בהוסדם יחד עלי לקחת נפשי זממו

¹⁵טו ואני עליך בטחתי יהוה אמרתי אלהי אתה

¹⁶טז בידך עתתי הצילני מיד-אויבי ומרדפי

¹⁷יז האירה פניך על-עבדך הושיעני בחסדך

¹⁸יח יהוה--אל-אבושה כי קראתיך יבשו רשעים ידמו לשאול

¹⁹יט תאלמנה שפתי-שקר הדברות על-צדיק עתק--בגאוה ובוז

²⁰כ מה רב-טובך אשר-צפנת ליראיך פעלת לחסים בך נגד בני אדם

²¹כא תסתירם בסתר פניך-- מרכסי-איש תצפנם בסכה מריב לשנות

²²כב ברוך יהוה כי הפליא חסדו לי בעיר מצור

²³כג ואני אמרתי בחפזי-- נגרזתי מנגד עיניך אכן--שמעת קול תחנוני בשועי אליך

²⁴כד אהבו את-יהוה כל-חסידיו אמונים נצר יהוה ומשלם על-יתר עשה גאוה [ (Psalms 31:25) כה חזקו ויאמץ לבבכם-- כל-המיחלים ליהוה ]