Read כֶּתֶר אֲרָם צוֹבָא - Tanah Aleppo Codex תהלים 33 Bible Online

תהלים 33 - כֶּתֶר אֲרָם צוֹבָא - Tanah Aleppo Codex bible

תהלים 33

¹א רננו צדיקים ביהוה לישרים נאוה תהלה

²ב הודו ליהוה בכנור בנבל עשור זמרו-לו

³ג שירו-לו שיר חדש היטיבו נגן בתרועה

⁴ד כי-ישר דבר-יהוה וכל-מעשהו באמונה

⁵ה אהב צדקה ומשפט חסד יהוה מלאה הארץ

⁶ו בדבר יהוה שמים נעשו וברוח פיו כל-צבאם

⁷ז כנס כנד מי הים נתן באוצרות תהומות

⁸ח ייראו מיהוה כל-הארץ ממנו יגורו כל-ישבי תבל

⁹ט כי הוא אמר ויהי הוא-צוה ויעמד

¹⁰י יהוה הפיר עצת-גוים הניא מחשבות עמים

¹¹יא עצת יהוה לעולם תעמד מחשבות לבו לדר ודר

¹²יב אשרי הגוי אשר-יהוה אלהיו העם בחר לנחלה לו

¹³יג משמים הביט יהוה ראה את-כל-בני האדם

¹⁴יד ממכון-שבתו השגיח-- אל כל-ישבי הארץ

¹⁵טו היצר יחד לבם המבין אל-כל-מעשיהם

¹⁶טז אין-המלך נושע ברב-חיל גבור לא-ינצל ברב-כח

¹⁷יז שקר הסוס לתשועה וברב חילו לא ימלט

¹⁸יח הנה עין יהוה אל-יראיו למיחלים לחסדו

¹⁹יט להציל ממות נפשם ולחיותם ברעב

²⁰כ נפשנו חכתה ליהוה עזרנו ומגננו הוא

²¹כא כי-בו ישמח לבנו כי בשם קדשו בטחנו

²²כב יהי-חסדך יהוה עלינו כאשר יחלנו לך