Read כֶּתֶר אֲרָם צוֹבָא - Tanah Aleppo Codex תהלים 35 Bible Online

תהלים 35 - כֶּתֶר אֲרָם צוֹבָא - Tanah Aleppo Codex bible

תהלים 35

¹א לדוד ריבה יהוה את-יריבי לחם את-לחמי

²ב החזק מגן וצנה וקומה בעזרתי

³ג והרק חנית וסגר לקראת רדפי אמר לנפשי ישעתך אני

⁴ד יבשו ויכלמו מבקשי נפשי יסגו אחור ויחפרו--חשבי רעתי

⁵ה יהיו כמץ לפני-רוח ומלאך יהוה דוחה

⁶ו יהי-דרכם חשך וחלקלקת ומלאך יהוה רדפם

⁷ז כי-חנם טמנו-לי שחת רשתם חנם חפרו לנפשי

⁸ח תבואהו שואה לא-ידע ורשתו אשר-טמן תלכדו בשואה יפל-בה

⁹ט ונפשי תגיל ביהוה תשיש בישועתו

¹⁰י כל עצמותי תאמרנה-- יהוה מי כמוך מציל עני מחזק ממנו ועני ואביון מגזלו

¹¹יא יקומון עדי חמס אשר לא-ידעתי ישאלוני

¹²יב ישלמוני רעה תחת טובה שכול לנפשי

¹³יג ואני בחלותם לבושי שק-- עניתי בצום נפשי ותפלתי על-חיקי תשוב

¹⁴יד כרע-כאח לי התהלכתי כאבל-אם קדר שחותי

¹⁵טו ובצלעי שמחו ונאספו נאספו עלי נכים ולא ידעתי קרעו ולא-דמו

¹⁶טז בחנפי לעגי מעוג-- חרק עלי שנימו

¹⁷יז אדני כמה תראה השיבה נפשי משאיהם מכפירים יחידתי

¹⁸יח אודך בקהל רב בעם עצום אהללך

¹⁹יט אל-ישמחו-לי איבי שקר שנאי חנם יקרצו-עין

²⁰כ כי לא שלום ידברו ועל רגעי-ארץ--דברי מרמות יחשבון

²¹כא וירחיבו עלי פיהם אמרו האח האח ראתה עיננו

²²כב ראיתה יהוה אל-תחרש אדני אל-תרחק ממני

²³כג העירה והקיצה למשפטי אלהי ואדני לריבי

²⁴כד שפטני כצדקך יהוה אלהי ואל-ישמחו-לי

²⁵כה אל-יאמרו בלבם האח נפשנו אל-יאמרו בלענוהו

²⁶כו יבשו ויחפרו יחדו-- שמחי רעתי ילבשו-בשת וכלמה-- המגדילים עלי

²⁷כז ירנו וישמחו חפצי צדקי ויאמרו תמיד יגדל יהוה החפץ שלום עבדו

²⁸כח ולשוני תהגה צדקך כל-היום תהלתך