Read כֶּתֶר אֲרָם צוֹבָא - Tanah Aleppo Codex תהלים 37 Bible Online

תהלים 37 - כֶּתֶר אֲרָם צוֹבָא - Tanah Aleppo Codex bible

תהלים 37

¹א לדוד אל-תתחר במרעים אל-תקנא בעשי עולה

²ב כי כחציר מהרה ימלו וכירק דשא יבולון

³ג בטח ביהוה ועשה-טוב שכן-ארץ ורעה אמונה

⁴ד והתענג על-יהוה ויתן-לך משאלת לבך

⁵ה גול על-יהוה דרכך ובטח עליו והוא יעשה

⁶ו והוציא כאור צדקך ומשפטך כצהרים

⁷ז דום ליהוה-- והתחולל-לו אל-תתחר במצליח דרכו באיש עשה מזמות

⁸ח הרף מאף ועזב חמה אל-תתחר אך-להרע

⁹ט כי-מרעים יכרתון וקוי יהוה המה יירשו-ארץ

¹⁰י ועוד מעט ואין רשע והתבוננת על-מקומו ואיננו

¹¹יא וענוים יירשו-ארץ והתענגו על-רב שלום

¹²יב זמם רשע לצדיק וחרק עליו שניו

¹³יג אדני ישחק-לו כי-ראה כי-יבא יומו

¹⁴יד חרב פתחו רשעים-- ודרכו קשתם להפיל עני ואביון לטבוח ישרי-דרך

¹⁵טו חרבם תבוא בלבם וקשתותם תשברנה

¹⁶טז טוב-מעט לצדיק-- מהמון רשעים רבים

¹⁷יז כי זרועות רשעים תשברנה וסומך צדיקים יהוה

¹⁸יח יודע יהוה ימי תמימם ונחלתם לעולם תהיה

¹⁹יט לא-יבשו בעת רעה ובימי רעבון ישבעו

²⁰כ כי רשעים יאבדו ואיבי יהוה כיקר כרים כלו בעשן כלו

²¹כא לוה רשע ולא ישלם וצדיק חונן ונותן

²²כב כי מברכיו יירשו ארץ ומקלליו יכרתו

²³כג מיהוה מצעדי-גבר כוננו ודרכו יחפץ

²⁴כד כי-יפל לא-יוטל כי-יהוה סומך ידו

²⁵כה נער הייתי-- גם-זקנתי ולא-ראיתי צדיק נעזב וזרעו מבקש-לחם

²⁶כו כל-היום חונן ומלוה וזרעו לברכה

²⁷כז סור מרע ועשה-טוב ושכן לעולם

²⁸כח כי יהוה אהב משפט ולא-יעזב את-חסידיו לעולם נשמרו וזרע רשעים נכרת

²⁹כט צדיקים יירשו-ארץ וישכנו לעד עליה

³⁰ל פי-צדיק יהגה חכמה ולשונו תדבר משפט

³¹לא תורת אלהיו בלבו לא תמעד אשריו

³²לב צופה רשע לצדיק ומבקש להמיתו

³³לג יהוה לא-יעזבנו בידו ולא ירשיענו בהשפטו

³⁴לד קוה אל-יהוה ושמר דרכו וירוממך לרשת ארץ בהכרת רשעים תראה

³⁵לה ראיתי רשע עריץ ומתערה כאזרח רענן

³⁶לו ויעבר והנה איננו ואבקשהו ולא נמצא

³⁷לז שמר-תם וראה ישר כי-אחרית לאיש שלום

³⁸לח ופשעים נשמדו יחדו אחרית רשעים נכרתה

³⁹לט ותשועת צדיקים מיהוה מעוזם בעת צרה

⁴⁰מ ויעזרם יהוה ויפלטם יפלטם מרשעים ויושיעם--כי-חסו בו