Read כֶּתֶר אֲרָם צוֹבָא - Tanah Aleppo Codex תהלים 50 Bible Online

תהלים 50 - כֶּתֶר אֲרָם צוֹבָא - Tanah Aleppo Codex bible

תהלים 50

¹א מזמור לאסף אל אלהים יהוה-- דבר ויקרא-ארץ ממזרח-שמש עד-מבאו

²ב מציון מכלל-יפי-- אלהים הופיע

³ג יבא אלהינו ואל-יחרש אש-לפניו תאכל וסביביו נשערה מאד

⁴ד יקרא אל-השמים מעל ואל-הארץ לדין עמו

⁵ה אספו-לי חסידי-- כרתי בריתי עלי-זבח

⁶ו ויגידו שמים צדקו כי-אלהים שפט הוא סלה

⁷ז שמעה עמי ואדברה-- ישראל ואעידה בך אלהים אלהיך אנכי

⁸ח לא על-זבחיך אוכיחך ועולתיך לנגדי תמיד

⁹ט לא-אקח מביתך פר ממכלאתיך עתודים

¹⁰י כי-לי כל-חיתו-יער בהמות בהררי-אלף

¹¹יא ידעתי כל-עוף הרים וזיז שדי עמדי

¹²יב אם-ארעב לא-אמר לך כי-לי תבל ומלאה

¹³יג האוכל בשר אבירים ודם עתודים אשתה

¹⁴יד זבח לאלהים תודה ושלם לעליון נדריך

¹⁵טו וקראני ביום צרה אחלצך ותכבדני

¹⁶טז ולרשע אמר אלהים מה-לך לספר חקי ותשא בריתי עלי-פיך

¹⁷יז ואתה שנאת מוסר ותשלך דברי אחריך

¹⁸יח אם-ראית גנב ותרץ עמו ועם מנאפים חלקך

¹⁹יט פיך שלחת ברעה ולשונך תצמיד מרמה

²⁰כ תשב באחיך תדבר בבן-אמך תתן-דפי

²¹כא אלה עשית והחרשתי-- דמית היות-אהיה כמוך אוכיחך ואערכה לעיניך

²²כב בינו-נא זאת שכחי אלוה פן-אטרף ואין מציל

²³כג זבח תודה יכבדנני ושם דרך--אראנו בישע אלהים