Read כֶּתֶר אֲרָם צוֹבָא - Tanah Aleppo Codex תהלים 55 Bible Online

תהלים 55 - כֶּתֶר אֲרָם צוֹבָא - Tanah Aleppo Codex bible

תהלים 55

¹א למנצח בנגינת משכיל לדוד

²ב האזינה אלהים תפלתי ואל-תתעלם מתחנתי

³ג הקשיבה לי וענני אריד בשיחי ואהימה

⁴ד מקול אויב--מפני עקת רשע כי-ימיטו עלי און ובאף ישטמוני

⁵ה לבי יחיל בקרבי ואימות מות נפלו עלי

⁶ו יראה ורעד יבא בי ותכסני פלצות

⁷ז ואמר--מי-יתן-לי אבר כיונה אעופה ואשכנה

⁸ח הנה ארחיק נדד אלין במדבר סלה

⁹ט אחישה מפלט לי-- מרוח סעה מסער

¹⁰י בלע אדני פלג לשונם כי-ראיתי חמס וריב בעיר

¹¹יא יומם ולילה--יסובבה על-חומתיה ואון ועמל בקרבה

¹²יב הוות בקרבה ולא-ימיש מרחבה תך ומרמה

¹³יג כי לא-אויב יחרפני ואשא לא-משנאי עלי הגדיל ואסתר ממנו

¹⁴יד ואתה אנוש כערכי אלופי ומידעי

¹⁵טו אשר יחדו נמתיק סוד בבית אלהים נהלך ברגש

¹⁶טז ישימות (ישי מות) עלימו--ירדו שאול חיים כי-רעות במגורם בקרבם

¹⁷יז אני אל-אלהים אקרא ויהוה יושיעני

¹⁸יח ערב ובקר וצהרים אשיחה ואהמה וישמע קולי

¹⁹יט פדה בשלום נפשי מקרב-לי כי-ברבים היו עמדי

²⁰כ ישמע אל ויענם-- וישב קדם סלה אשר אין חליפות למו ולא יראו אלהים

²¹כא שלח ידיו בשלמיו חלל בריתו

²²כב חלקו מחמאת פיו-- וקרב-לבו רכו דבריו משמן והמה פתחות

²³כג השלך על-יהוה יהבך-- והוא יכלכלך לא-יתן לעולם מוט-- לצדיק [ (Psalms 55:24) כד ואתה אלהים תורדם לבאר שחת-- אנשי דמים ומרמה לא-יחצו ימיהם ואני אבטח-בך ]