Read כֶּתֶר אֲרָם צוֹבָא - Tanah Aleppo Codex תהלים 66 Bible Online

תהלים 66 - כֶּתֶר אֲרָם צוֹבָא - Tanah Aleppo Codex bible

תהלים 66

¹א למנצח שיר מזמור הריעו לאלהים כל-הארץ

²ב זמרו כבוד-שמו שימו כבוד תהלתו

³ג אמרו לאלהים מה-נורא מעשיך ברב עזך יכחשו לך איביך

⁴ד כל-הארץ ישתחוו לך--ויזמרו-לך יזמרו שמך סלה

⁵ה לכו וראו מפעלות אלהים נורא עלילה על-בני אדם

⁶ו הפך ים ליבשה--בנהר יעברו ברגל שם נשמחה-בו

⁷ז משל בגבורתו עולם-- עיניו בגוים תצפינה הסוררים אל-ירימו (ירומו) למו סלה

⁸ח ברכו עמים אלהינו והשמיעו קול תהלתו

⁹ט השם נפשנו בחיים ולא-נתן למוט רגלנו

¹⁰י כי-בחנתנו אלהים צרפתנו כצרף-כסף

¹¹יא הבאתנו במצודה שמת מועקה במתנינו

¹²יב הרכבת אנוש לראשנו באנו-באש ובמים ותוציאנו לרויה

¹³יג אבוא ביתך בעולות אשלם לך נדרי

¹⁴יד אשר-פצו שפתי ודבר-פי בצר-לי

¹⁵טו עלות מיחים אעלה-לך עם-קטרת אילים אעשה בקר עם-עתודים סלה

¹⁶טז לכו-שמעו ואספרה כל-יראי אלהים אשר עשה לנפשי

¹⁷יז אליו פי-קראתי ורומם תחת לשוני

¹⁸יח און אם-ראיתי בלבי-- לא ישמע אדני

¹⁹יט אכן שמע אלהים הקשיב בקול תפלתי

²⁰כ ברוך אלהים-- אשר לא-הסיר תפלתי וחסדו מאתי