Read כֶּתֶר אֲרָם צוֹבָא - Tanah Aleppo Codex תהלים 68 Bible Online

תהלים 68 - כֶּתֶר אֲרָם צוֹבָא - Tanah Aleppo Codex bible

תהלים 68

¹א למנצח לדוד מזמור שיר

²ב יקום אלהים יפוצו אויביו וינוסו משנאיו מפניו

³ג כהנדף עשן תנדף כהמס דונג מפני-אש-- יאבדו רשעים מפני אלהים

⁴ד וצדיקים--ישמחו יעלצו לפני אלהים וישישו בשמחה

⁵ה שירו לאלהים-- זמרו שמו סלו לרכב בערבות--ביה שמו ועלזו לפניו

⁶ו אבי יתומים ודין אלמנות-- אלהים במעון קדשו

⁷ז אלהים מושיב יחידים ביתה-- מוציא אסירים בכושרות אך סוררים שכנו צחיחה

⁸ח אלהים--בצאתך לפני עמך בצעדך בישימון סלה

⁹ט ארץ רעשה אף-שמים נטפו-- מפני אלהים זה סיני-- מפני אלהים אלהי ישראל

¹⁰י גשם נדבות תניף אלהים נחלתך ונלאה אתה כוננתה

¹¹יא חיתך ישבו-בה תכין בטובתך לעני אלהים

¹²יב אדני יתן-אמר המבשרות צבא רב

¹³יג מלכי צבאות ידדון ידדון ונות-בית תחלק שלל

¹⁴יד אם-תשכבון בין שפתים כנפי יונה נחפה בכסף ואברותיה בירקרק חרוץ

¹⁵טו בפרש שדי מלכים בה-- תשלג בצלמון

¹⁶טז הר-אלהים הר-בשן הר גבננים הר-בשן

¹⁷יז למה תרצדון-- הרים גבננים ההר--חמד אלהים לשבתו אף-יהוה ישכן לנצח

¹⁸יח רכב אלהים רבתים אלפי שנאן אדני בם סיני בקדש

¹⁹יט עלית למרום שבית שבי-- לקחת מתנות באדם ואף סוררים לשכן יה אלהים

²⁰כ ברוך אדני יום יום יעמס-לנו--האל ישועתנו סלה

²¹כא האל לנו אל למושעות וליהוה אדני--למות תצאות

²²כב אך-אלהים--ימחץ ראש איביו קדקד שער--מתהלך באשמיו

²³כג אמר אדני מבשן אשיב אשיב ממצלות ים

²⁴כד למען תמחץ רגלך--בדם לשון כלביך--מאיבים מנהו

²⁵כה ראו הליכותיך אלהים הליכות אלי מלכי בקדש

²⁶כו קדמו שרים אחר נגנים בתוך עלמות תופפות

²⁷כז במקהלות ברכו אלהים אדני ממקור ישראל

²⁸כח שם בנימן צעיר רדם--שרי יהודה רגמתם שרי זבלון שרי נפתלי

²⁹כט צוה אלהיך עזך עוזה אלהים--זו פעלת לנו

³⁰ל מהיכלך על-ירושלם-- לך יובילו מלכים שי

³¹לא גער חית קנה עדת אבירים בעגלי עמים-- מתרפס ברצי-כסף בזר עמים קרבות יחפצו

³²לב יאתיו חשמנים מני מצרים כוש תריץ ידיו לאלהים

³³לג ממלכות הארץ שירו לאלהים זמרו אדני סלה

³⁴לד לרכב בשמי שמי-קדם-- הן יתן בקולו קול עז

³⁵לה תנו עז לאלהים על-ישראל גאותו ועזו בשחקים [ (Psalms 68:36) לו נורא אלהים ממקדשיך אל ישראל-- הוא נתן עז ותעצמות לעם ברוך אלהים ]