Read כֶּתֶר אֲרָם צוֹבָא - Tanah Aleppo Codex תהלים 69 Bible Online

תהלים 69 - כֶּתֶר אֲרָם צוֹבָא - Tanah Aleppo Codex bible

תהלים 69

¹א למנצח על-שושנים לדוד

²ב הושיעני אלהים-- כי באו מים עד-נפש

³ג טבעתי ביון מצולה-- ואין מעמד באתי במעמקי-מים ושבלת שטפתני

⁴ד יגעתי בקראי נחר גרוני כלו עיני--מיחל לאלהי

⁵ה רבו משערות ראשי-- שנאי חנם עצמו מצמיתי איבי שקר-- אשר לא-גזלתי אז אשיב

⁶ו אלהים--אתה ידעת לאולתי ואשמותי ממך לא-נכחדו

⁷ז אל-יבשו בי קויך-- אדני יהוה צבאות אל-יכלמו בי מבקשיך-- אלהי ישראל

⁸ח כי-עליך נשאתי חרפה כסתה כלמה פני

⁹ט מוזר הייתי לאחי ונכרי לבני אמי

¹⁰י כי-קנאת ביתך אכלתני וחרפות חורפיך נפלו עלי

¹¹יא ואבכה בצום נפשי ותהי לחרפות לי

¹²יב ואתנה לבושי שק ואהי להם למשל

¹³יג ישיחו בי ישבי שער ונגינות שותי שכר

¹⁴יד ואני תפלתי-לך יהוה עת רצון-- אלהים ברב-חסדך ענני באמת ישעך

¹⁵טו הצילני מטיט ואל-אטבעה אנצלה משנאי וממעמקי מים

¹⁶טז אל-תשטפני שבלת מים-- ואל-תבלעני מצולה ואל-תאטר-עלי באר פיה

¹⁷יז ענני יהוה כי-טוב חסדך כרב רחמיך פנה אלי

¹⁸יח ואל-תסתר פניך מעבדך כי-צר-לי מהר ענני

¹⁹יט קרבה אל-נפשי גאלה למען איבי פדני

²⁰כ אתה ידעת--חרפתי ובשתי וכלמתי נגדך כל-צוררי

²¹כא חרפה שברה לבי-- ואנושה ואקוה לנוד ואין ולמנחמים ולא מצאתי

²²כב ויתנו בברותי ראש ולצמאי ישקוני חמץ

²³כג יהי-שלחנם לפניהם לפח ולשלומים למוקש

²⁴כד תחשכנה עיניהם מראות ומתניהם תמיד המעד

²⁵כה שפך-עליהם זעמך וחרון אפך ישיגם

²⁶כו תהי-טירתם נשמה באהליהם אל-יהי ישב

²⁷כז כי-אתה אשר-הכית רדפו ואל-מכאוב חלליך יספרו

²⁸כח תנה-עון על-עונם ואל-יבאו בצדקתך

²⁹כט ימחו מספר חיים ועם צדיקים אל-יכתבו

³⁰ל ואני עני וכואב ישועתך אלהים תשגבני

³¹לא אהללה שם-אלהים בשיר ואגדלנו בתודה

³²לב ותיטב ליהוה משור פר מקרן מפריס

³³לג ראו ענוים ישמחו דרשי אלהים ויחי לבבכם

³⁴לד כי-שמע אל-אביונים יהוה ואת-אסיריו לא בזה

³⁵לה יהללוהו שמים וארץ ימים וכל-רמש בם

³⁶לו כי אלהים יושיע ציון ויבנה ערי יהודה וישבו שם וירשוה [ (Psalms 69:37) לז וזרע עבדיו ינחלוה ואהבי שמו ישכנו-בה ]