Read כֶּתֶר אֲרָם צוֹבָא - Tanah Aleppo Codex תהלים 71 Bible Online

תהלים 71 - כֶּתֶר אֲרָם צוֹבָא - Tanah Aleppo Codex bible

תהלים 71

¹א בך-יהוה חסיתי אל-אבושה לעולם

²ב בצדקתך תצילני ותפלטני הטה-אלי אזנך והושיעני

³ג היה לי לצור מעון לבוא-- תמיד צוית להושיעני כי-סלעי ומצודתי אתה

⁴ד אלהי--פלטני מיד רשע מכף מעול וחומץ

⁵ה כי-אתה תקותי אדני יהוה מבטחי מנעורי

⁶ו עליך נסמכתי מבטן--ממעי אמי אתה גוזי בך תהלתי תמיד

⁷ז כמופת הייתי לרבים ואתה מחסי-עז

⁸ח ימלא פי תהלתך כל-היום תפארתך

⁹ט אל-תשליכני לעת זקנה ככלות כחי אל-תעזבני

¹⁰י כי-אמרו אויבי לי ושמרי נפשי נועצו יחדו

¹¹יא לאמר אלהים עזבו רדפו ותפשוהו כי-אין מציל

¹²יב אלהים אל-תרחק ממני אלהי לעזרתי חישה (חושה)

¹³יג יבשו יכלו שטני נפשי יעטו חרפה וכלמה--מבקשי רעתי

¹⁴יד ואני תמיד איחל והוספתי על-כל-תהלתך

¹⁵טו פי יספר צדקתך--כל-היום תשועתך כי לא ידעתי ספרות

¹⁶טז אבוא--בגברות אדני יהוה אזכיר צדקתך לבדך

¹⁷יז אלהים למדתני מנעורי ועד-הנה אגיד נפלאותיך

¹⁸יח וגם עד-זקנה ושיבה-- אלהים אל-תעזבני עד-אגיד זרועך לדור לכל-יבוא גבורתך

¹⁹יט וצדקתך אלהים עד-מרום אשר-עשית גדלות אלהים מי כמוך

²⁰כ אשר הראיתנו (הראיתני) צרות רבות-- ורעות תשוב תחינו (תחיני) ומתהמות הארץ תשוב תעלני

²¹כא תרב גדלתי ותסב תנחמני

²²כב גם-אני אודך בכלי-נבל-- אמתך אלהי אזמרה לך בכנור-- קדוש ישראל

²³כג תרננה שפתי כי אזמרה-לך ונפשי אשר פדית

²⁴כד גם-לשוני-- כל-היום תהגה צדקתך כי-בשו כי-חפרו מבקשי רעתי