Read כֶּתֶר אֲרָם צוֹבָא - Tanah Aleppo Codex תהלים 73 Bible Online

תהלים 73 - כֶּתֶר אֲרָם צוֹבָא - Tanah Aleppo Codex bible

תהלים 73

¹א מזמור לאסף אך טוב לישראל אלהים-- לברי לבב

²ב ואני--כמעט נטוי (נטיו) רגלי כאין שפכה (שפכו) אשרי

³ג כי-קנאתי בהוללים שלום רשעים אראה

⁴ד כי אין חרצבות למותם ובריא אולם

⁵ה בעמל אנוש אינמו ועם-אדם לא ינגעו

⁶ו לכן ענקתמו גאוה יעטף-שית חמס למו

⁷ז יצא מחלב עינמו עברו משכיות לבב

⁸ח ימיקו וידברו ברע עשק ממרום ידברו

⁹ט שתו בשמים פיהם ולשונם תהלך בארץ

¹⁰י לכן ישיב (ישוב) עמו הלם ומי מלא ימצו למו

¹¹יא ואמרו איכה ידע-אל ויש דעה בעליון

¹²יב הנה-אלה רשעים ושלוי עולם השגו-חיל

¹³יג אך-ריק זכיתי לבבי וארחץ בנקיון כפי

¹⁴יד ואהי נגוע כל-היום ותוכחתי לבקרים

¹⁵טו אם-אמרתי אספרה כמו הנה דור בניך בגדתי

¹⁶טז ואחשבה לדעת זאת עמל היא (הוא) בעיני

¹⁷יז עד-אבוא אל-מקדשי-אל אבינה לאחריתם

¹⁸יח אך בחלקות תשית למו הפלתם למשואות

¹⁹יט איך היו לשמה כרגע ספו תמו מן-בלהות

²⁰כ כחלום מהקיץ-- אדני בעיר צלמם תבזה

²¹כא כי יתחמץ לבבי וכליותי אשתונן

²²כב ואני-בער ולא אדע בהמות הייתי עמך

²³כג ואני תמיד עמך אחזת ביד-ימיני

²⁴כד בעצתך תנחני ואחר כבוד תקחני

²⁵כה מי-לי בשמים ועמך לא-חפצתי בארץ

²⁶כו כלה שארי ולבבי צור-לבבי וחלקי--אלהים לעולם

²⁷כז כי-הנה רחקיך יאבדו הצמתה כל-זונה ממך

²⁸כח ואני קרבת אלהים-- לי-טוב שתי באדני יהוה מחסי לספר כל-מלאכותיך