Read כֶּתֶר אֲרָם צוֹבָא - Tanah Aleppo Codex תהלים 74 Bible Online

תהלים 74 - כֶּתֶר אֲרָם צוֹבָא - Tanah Aleppo Codex bible

תהלים 74

¹א משכיל לאסף למה אלהים זנחת לנצח יעשן אפך בצאן מרעיתך

²ב זכר עדתך קנית קדם-- גאלת שבט נחלתך הר-ציון זה שכנת בו

³ג הרימה פעמיך למשאות נצח כל-הרע אויב בקדש

⁴ד שאגו צרריך בקרב מועדך שמו אותתם אתות

⁵ה יודע כמביא למעלה בסבך-עץ קרדמות

⁶ו ועת (ועתה) פתוחיה יחד-- בכשיל וכילפות יהלמון

⁷ז שלחו באש מקדשך לארץ חללו משכן-שמך

⁸ח אמרו בלבם נינם יחד שרפו כל-מועדי-אל בארץ

⁹ט אותתינו לא ראינו אין-עוד נביא ולא-אתנו ידע עד-מה

¹⁰י עד-מתי אלהים יחרף צר ינאץ אויב שמך לנצח

¹¹יא למה תשיב ידך וימינך מקרב חוקך (חיקך) כלה

¹²יב ואלהים מלכי מקדם פעל ישועות בקרב הארץ

¹³יג אתה פוררת בעזך ים שברת ראשי תנינים על-המים

¹⁴יד אתה רצצת ראשי לויתן תתננו מאכל לעם לציים

¹⁵טו אתה בקעת מעין ונחל אתה הובשת נהרות איתן

¹⁶טז לך יום אף-לך לילה אתה הכינות מאור ושמש

¹⁷יז אתה הצבת כל-גבולות ארץ קיץ וחרף אתה יצרתם

¹⁸יח זכר-זאת--אויב חרף יהוה ועם נבל נאצו שמך

¹⁹יט אל-תתן לחית נפש תורך חית ענייך אל-תשכח לנצח

²⁰כ הבט לברית כי מלאו מחשכי-ארץ נאות חמס

²¹כא אל-ישב דך נכלם עני ואביון יהללו שמך

²²כב קומה אלהים ריבה ריבך זכר חרפתך מני-נבל כל-היום

²³כג אל-תשכח קול צרריך שאון קמיך עלה תמיד