Read כֶּתֶר אֲרָם צוֹבָא - Tanah Aleppo Codex תהלים 78 Bible Online

תהלים 78 - כֶּתֶר אֲרָם צוֹבָא - Tanah Aleppo Codex bible

תהלים 78

¹א משכיל לאסף האזינה עמי תורתי הטו אזנכם לאמרי-פי

²ב אפתחה במשל פי אביעה חידות מני-קדם

³ג אשר שמענו ונדעם ואבותינו ספרו-לנו

⁴ד לא נכחד מבניהם-- לדור אחרון מספרים תהלות יהוה ועזוזו ונפלאתיו אשר עשה

⁵ה ויקם עדות ביעקב ותורה שם בישראל אשר צוה את-אבותינו-- להודיעם לבניהם

⁶ו למען ידעו דור אחרון--בנים יולדו יקמו ויספרו לבניהם

⁷ז וישימו באלהים כסלם ולא ישכחו מעללי-אל ומצותיו ינצרו

⁸ח ולא יהיו כאבותם-- דור סורר ומרה דור לא-הכין לבו ולא-נאמנה את-אל רוחו

⁹ט בני-אפרים נושקי רומי-קשת הפכו ביום קרב

¹⁰י לא שמרו ברית אלהים ובתורתו מאנו ללכת

¹¹יא וישכחו עלילותיו ונפלאותיו אשר הראם

¹²יב נגד אבותם עשה פלא בארץ מצרים שדה-צען

¹³יג בקע ים ויעבירם ויצב-מים כמו-נד

¹⁴יד וינחם בענן יומם וכל-הלילה באור אש

¹⁵טו יבקע צרים במדבר וישק כתהמות רבה

¹⁶טז ויוצא נוזלים מסלע ויורד כנהרות מים

¹⁷יז ויוסיפו עוד לחטא-לו-- למרות עליון בציה

¹⁸יח וינסו-אל בלבבם-- לשאל-אכל לנפשם

¹⁹יט וידברו באלהים אמרו היוכל אל--לערך שלחן במדבר

²⁰כ הן הכה-צור ויזובו מים-- ונחלים ישטפו הגם-לחם יוכל תת אם-יכין שאר לעמו

²¹כא לכן שמע יהוה-- ויתעבר ואש נשקה ביעקב וגם-אף עלה בישראל

²²כב כי לא האמינו באלהים ולא בטחו בישועתו

²³כג ויצו שחקים ממעל ודלתי שמים פתח

²⁴כד וימטר עליהם מן לאכל ודגן-שמים נתן למו

²⁵כה לחם אבירים אכל איש צידה שלח להם לשבע

²⁶כו יסע קדים בשמים וינהג בעזו תימן

²⁷כז וימטר עליהם כעפר שאר וכחול ימים עוף כנף

²⁸כח ויפל בקרב מחנהו סביב למשכנתיו

²⁹כט ויאכלו וישבעו מאד ותאותם יבא להם

³⁰ל לא-זרו מתאותם עוד אכלם בפיהם

³¹לא ואף אלהים עלה בהם ויהרג במשמניהם ובחורי ישראל הכריע

³²לב בכל-זאת חטאו-עוד ולא-האמינו בנפלאותיו

³³לג ויכל-בהבל ימיהם ושנותם בבהלה

³⁴לד אם-הרגם ודרשוהו ושבו ושחרו-אל

³⁵לה ויזכרו כי-אלהים צורם ואל עליון גאלם

³⁶לו ויפתוהו בפיהם ובלשונם יכזבו-לו

³⁷לז ולבם לא-נכון עמו ולא נאמנו בבריתו

³⁸לח והוא רחום יכפר עון-- ולא-ישחית והרבה להשיב אפו ולא-יעיר כל-חמתו

³⁹לט ויזכר כי-בשר המה רוח הולך ולא ישוב

⁴⁰מ כמה ימרוהו במדבר יעציבוהו בישימון

⁴¹מא וישובו וינסו אל וקדוש ישראל התוו

⁴²מב לא-זכרו את-ידו יום אשר-פדם מני-צר

⁴³מג אשר-שם במצרים אתותיו ומופתיו בשדה-צען

⁴⁴מד ויהפך לדם יאריהם ונזליהם בל-ישתיון

⁴⁵מה ישלח בהם ערב ויאכלם וצפרדע ותשחיתם

⁴⁶מו ויתן לחסיל יבולם ויגיעם לארבה

⁴⁷מז יהרג בברד גפנם ושקמותם בחנמל

⁴⁸מח ויסגר לברד בעירם ומקניהם לרשפים

⁴⁹מט ישלח-בם חרון אפו--עברה וזעם וצרה משלחת מלאכי רעים

⁵⁰נ יפלס נתיב לאפו לא-חשך ממות נפשם וחיתם לדבר הסגיר

⁵¹נא ויך כל-בכור במצרים ראשית אונים באהלי-חם

⁵²נב ויסע כצאן עמו וינהגם כעדר במדבר

⁵³נג וינחם לבטח ולא פחדו ואת-אויביהם כסה הים

⁵⁴נד ויביאם אל-גבול קדשו הר-זה קנתה ימינו

⁵⁵נה ויגרש מפניהם גוים-- ויפילם בחבל נחלה וישכן באהליהם שבטי ישראל

⁵⁶נו וינסו וימרו את-אלהים עליון ועדותיו לא שמרו

⁵⁷נז ויסגו ויבגדו כאבותם נהפכו כקשת רמיה

⁵⁸נח ויכעיסוהו בבמותם ובפסיליהם יקניאוהו

⁵⁹נט שמע אלהים ויתעבר וימאס מאד בישראל

⁶⁰ס ויטש משכן שלו אהל שכן באדם

⁶¹סא ויתן לשבי עזו ותפארתו ביד-צר

⁶²סב ויסגר לחרב עמו ובנחלתו התעבר

⁶³סג בחוריו אכלה-אש ובתולתיו לא הוללו

⁶⁴סד כהניו בחרב נפלו ואלמנתיו לא תבכינה

⁶⁵סה ויקץ כישן אדני כגבור מתרונן מיין

⁶⁶סו ויך-צריו אחור חרפת עולם נתן למו

⁶⁷סז וימאס באהל יוסף ובשבט אפרים לא בחר

⁶⁸סח ויבחר את-שבט יהודה את-הר ציון אשר אהב

⁶⁹סט ויבן כמו-רמים מקדשו כארץ יסדה לעולם

⁷⁰ע ויבחר בדוד עבדו ויקחהו ממכלאת צאן

⁷¹עא מאחר עלות הביאו לרעות ביעקב עמו ובישראל נחלתו

⁷²עב וירעם כתם לבבו ובתבונות כפיו ינחם