Read כֶּתֶר אֲרָם צוֹבָא - Tanah Aleppo Codex תהלים 79 Bible Online

תהלים 79 - כֶּתֶר אֲרָם צוֹבָא - Tanah Aleppo Codex bible

תהלים 79

¹א מזמור לאסף אלהים באו גוים בנחלתך-- טמאו את היכל קדשך שמו את-ירושלם לעיים

²ב נתנו את-נבלת עבדיך-- מאכל לעוף השמים בשר חסידיך לחיתו-ארץ

³ג שפכו דמם כמים--סביבות ירושלם ואין קובר

⁴ד היינו חרפה לשכנינו לעג וקלס לסביבותינו

⁵ה עד-מה יהוה תאנף לנצח תבער כמו-אש קנאתך

⁶ו שפך חמתך-- אל הגוים אשר לא-ידעוך ועל ממלכות-- אשר בשמך לא קראו

⁷ז כי אכל את-יעקב ואת-נוהו השמו

⁸ח אל-תזכר-לנו עונת ראשנים מהר יקדמונו רחמיך-- כי דלונו מאד

⁹ט עזרנו אלהי ישענו-- על-דבר כבוד-שמך והצילנו וכפר על-חטאתינו למען שמך

¹⁰י למה יאמרו הגוים-- איה אלהיהם יודע בגיים (בגוים) לעינינו נקמת דם-עבדיך השפוך

¹¹יא תבוא לפניך אנקת אסיר כגדל זרועך--הותר בני תמותה

¹²יב והשב לשכנינו שבעתים אל-חיקם חרפתם אשר חרפוך אדני

¹³יג ואנחנו עמך וצאן מרעיתך-- נודה לך לעולם לדר ודר-- נספר תהלתך