Read כֶּתֶר אֲרָם צוֹבָא - Tanah Aleppo Codex תהלים 86 Bible Online

תהלים 86 - כֶּתֶר אֲרָם צוֹבָא - Tanah Aleppo Codex bible

תהלים 86

¹א תפלה לדוד הטה-יהוה אזנך ענני-- כי-עני ואביון אני

²ב שמרה נפשי כי-חסיד אני הושע עבדך אתה אלהי-- הבוטח אליך

³ג חנני אדני כי אליך אקרא כל-היום

⁴ד שמח נפש עבדך כי אליך אדני נפשי אשא

⁵ה כי-אתה אדני טוב וסלח ורב-חסד לכל-קראיך

⁶ו האזינה יהוה תפלתי והקשיבה בקול תחנונותי

⁷ז ביום צרתי אקראך כי תענני

⁸ח אין-כמוך באלהים אדני ואין כמעשיך

⁹ט כל-גוים אשר עשית--יבואו וישתחוו לפניך אדני ויכבדו לשמך

¹⁰י כי-גדול אתה ועשה נפלאות אתה אלהים לבדך

¹¹יא הורני יהוה דרכך-- אהלך באמתך יחד לבבי ליראה שמך

¹²יב אודך אדני אלהי--בכל-לבבי ואכבדה שמך לעולם

¹³יג כי-חסדך גדול עלי והצלת נפשי משאול תחתיה

¹⁴יד אלהים זדים קמו-עלי ועדת עריצים בקשו נפשי ולא שמוך לנגדם

¹⁵טו ואתה אדני אל-רחום וחנון ארך אפים ורב-חסד ואמת

¹⁶טז פנה אלי וחנני תנה-עזך לעבדך והושיעה לבן-אמתך

¹⁷יז עשה-עמי אות לטובה ויראו שנאי ויבשו-- כי-אתה יהוה עזרתני ונחמתני