Read כֶּתֶר אֲרָם צוֹבָא - Tanah Aleppo Codex תהלים 90 Bible Online

תהלים 90 - כֶּתֶר אֲרָם צוֹבָא - Tanah Aleppo Codex bible

תהלים 90

¹א תפלה למשה איש-האלהים אדני--מעון אתה היית לנו בדר ודר

²ב בטרם הרים ילדו-- ותחולל ארץ ותבל ומעולם עד-עולם אתה אל

³ג תשב אנוש עד-דכא ותאמר שובו בני-אדם

⁴ד כי אלף שנים בעיניך-- כיום אתמול כי יעבר ואשמורה בלילה

⁵ה זרמתם שנה יהיו בבקר כחציר יחלף

⁶ו בבקר יציץ וחלף לערב ימולל ויבש

⁷ז כי-כלינו באפך ובחמתך נבהלנו

⁸ח שת (שתה) עונתינו לנגדך עלמנו למאור פניך

⁹ט כי כל-ימינו פנו בעברתך כלינו שנינו כמו-הגה

¹⁰י ימי-שנותינו בהם שבעים שנה ואם בגבורת שמונים שנה-- ורהבם עמל ואון כי-גז חיש ונעפה

¹¹יא מי-יודע עז אפך וכיראתך עברתך

¹²יב למנות ימינו כן הודע ונבא לבב חכמה

¹³יג שובה יהוה עד-מתי והנחם על-עבדיך

¹⁴יד שבענו בבקר חסדך ונרננה ונשמחה בכל-ימינו

¹⁵טו שמחנו כימות עניתנו שנות ראינו רעה

¹⁶טז יראה אל-עבדיך פעלך והדרך על-בניהם

¹⁷יז ויהי נעם אדני אלהינו-- עלינו ומעשה ידינו כוננה עלינו ומעשה ידינו כוננהו