Read כֶּתֶר אֲרָם צוֹבָא - Tanah Aleppo Codex תהלים 96 Bible Online

תהלים 96 - כֶּתֶר אֲרָם צוֹבָא - Tanah Aleppo Codex bible

תהלים 96

¹א שירו ליהוה שיר חדש שירו ליהוה כל-הארץ

²ב שירו ליהוה ברכו שמו בשרו מיום-ליום ישועתו

³ג ספרו בגוים כבודו בכל-העמים נפלאותיו

⁴ד כי גדול יהוה ומהלל מאד נורא הוא על-כל-אלהים

⁵ה כי כל-אלהי העמים אלילים ויהוה שמים עשה

⁶ו הוד-והדר לפניו עז ותפארת במקדשו

⁷ז הבו ליהוה משפחות עמים הבו ליהוה כבוד ועז

⁸ח הבו ליהוה כבוד שמו שאו-מנחה ובאו לחצרותיו

⁹ט השתחוו ליהוה בהדרת-קדש חילו מפניו כל-הארץ

¹⁰י אמרו בגוים יהוה מלך-- אף-תכון תבל בל-תמוט ידין עמים במישרים

¹¹יא ישמחו השמים ותגל הארץ ירעם הים ומלאו

¹²יב יעלז שדי וכל-אשר-בו אז ירננו כל-עצי-יער

¹³יג לפני יהוה כי בא-- כי בא לשפט הארץ ישפט-תבל בצדק ועמים באמונתו