Read כֶּתֶר אֲרָם צוֹבָא - Tanah Aleppo Codex משלי 1 Bible Online

משלי 1 - כֶּתֶר אֲרָם צוֹבָא - Tanah Aleppo Codex bible

משלי 1

¹א משלי שלמה בן-דוד-- מלך ישראל

²ב לדעת חכמה ומוסר להבין אמרי בינה

³ג לקחת מוסר השכל צדק ומשפט ומשרים

⁴ד לתת לפתאים ערמה לנער דעת ומזמה

⁵ה ישמע חכם ויוסף לקח ונבון תחבלות יקנה

⁶ו להבין משל ומליצה דברי חכמים וחידתם

⁷ז יראת יהוה ראשית דעת חכמה ומוסר אוילים בזו

⁸ח שמע בני מוסר אביך ואל-תטש תורת אמך

⁹ט כי לוית חן הם לראשך וענקים לגרגרתך

¹⁰י בני-- אם-יפתוך חטאים אל-תבא

¹¹יא אם-יאמרו לכה אתנו נארבה לדם נצפנה לנקי חנם

¹²יב נבלעם כשאול חיים ותמימים כיורדי בור

¹³יג כל-הון יקר נמצא נמלא בתינו שלל

¹⁴יד גורלך תפיל בתוכנו כיס אחד יהיה לכלנו

¹⁵טו בני--אל-תלך בדרך אתם מנע רגלך מנתיבתם

¹⁶טז כי רגליהם לרע ירוצו וימהרו לשפך-דם

¹⁷יז כי-חנם מזרה הרשת-- בעיני כל-בעל כנף

¹⁸יח והם לדמם יארבו יצפנו לנפשתם

¹⁹יט כן--ארחות כל-בצע בצע את-נפש בעליו יקח

²⁰כ חכמות בחוץ תרנה ברחבות תתן קולה

²¹כא בראש המיות תקרא בפתחי שערים בעיר--אמריה תאמר

²²כב עד-מתי פתים-- תאהבו-פתי ולצים--לצון חמדו להם וכסילים ישנאו-דעת

²³כג תשובו לתוכחתי הנה אביעה לכם רוחי אודיעה דברי אתכם

²⁴כד יען קראתי ותמאנו נטיתי ידי ואין מקשיב

²⁵כה ותפרעו כל-עצתי ותוכחתי לא אביתם

²⁶כו גם-אני באידכם אשחק אלעג בבא פחדכם

²⁷כז בבא כשאוה (כשואה) פחדכם-- ואידכם כסופה יאתה בבא עליכם צרה וצוקה

²⁸כח אז יקראנני ולא אענה ישחרנני ולא ימצאנני

²⁹כט תחת כי-שנאו דעת ויראת יהוה לא בחרו

³⁰ל לא-אבו לעצתי נאצו כל-תוכחתי

³¹לא ויאכלו מפרי דרכם וממעצתיהם ישבעו

³²לב כי משובת פתים תהרגם ושלות כסילים תאבדם

³³לג ושמע לי ישכן-בטח ושאנן מפחד רעה