Read כֶּתֶר אֲרָם צוֹבָא - Tanah Aleppo Codex משלי 10 Bible Online

משלי 10 - כֶּתֶר אֲרָם צוֹבָא - Tanah Aleppo Codex bible

משלי 10

¹א משלי שלמה בן חכם ישמח-אב ובן כסיל תוגת אמו

²ב לא-יועילו אוצרות רשע וצדקה תציל ממות

³ג לא-ירעיב יהוה נפש צדיק והות רשעים יהדף

⁴ד ראש--עשה כף-רמיה ויד חרוצים תעשיר

⁵ה אגר בקיץ בן משכיל נרדם בקציר בן מביש

⁶ו ברכות לראש צדיק ופי רשעים יכסה חמס

⁷ז זכר צדיק לברכה ושם רשעים ירקב

⁸ח חכם-לב יקח מצות ואויל שפתים ילבט

⁹ט הולך בתם ילך בטח ומעקש דרכיו יודע

¹⁰י קרץ עין יתן עצבת ואויל שפתים ילבט

¹¹יא מקור חיים פי צדיק ופי רשעים יכסה חמס

¹²יב שנאה תערר מדנים ועל כל-פשעים תכסה אהבה

¹³יג בשפתי נבון תמצא חכמה ושבט לגו חסר-לב

¹⁴יד חכמים יצפנו-דעת ופי-אויל מחתה קרבה

¹⁵טו הון עשיר קרית עזו מחתת דלים רישם

¹⁶טז פעלת צדיק לחיים תבואת רשע לחטאת

¹⁷יז ארח לחיים שומר מוסר ועזב תוכחת מתעה

¹⁸יח מכסה שנאה שפתי-שקר ומוצא דבה הוא כסיל

¹⁹יט ברב דברים לא יחדל-פשע וחושך שפתיו משכיל

²⁰כ כסף נבחר לשון צדיק לב רשעים כמעט

²¹כא שפתי צדיק ירעו רבים ואוילים בחסר-לב ימותו

²²כב ברכת יהוה היא תעשיר ולא-יוסף עצב עמה

²³כג כשחוק לכסיל עשות זמה וחכמה לאיש תבונה

²⁴כד מגורת רשע היא תבואנו ותאות צדיקים יתן

²⁵כה כעבור סופה ואין רשע וצדיק יסוד עולם

²⁶כו כחמץ לשנים--וכעשן לעינים כן העצל לשלחיו

²⁷כז יראת יהוה תוסיף ימים ושנות רשעים תקצרנה

²⁸כח תוחלת צדיקים שמחה ותקות רשעים תאבד

²⁹כט מעוז לתם דרך יהוה ומחתה לפעלי און

³⁰ל צדיק לעולם בל-ימוט ורשעים לא ישכנו-ארץ

³¹לא פי-צדיק ינוב חכמה ולשון תהפכות תכרת

³²לב שפתי צדיק ידעון רצון ופי רשעים תהפכות