Read כֶּתֶר אֲרָם צוֹבָא - Tanah Aleppo Codex משלי 11 Bible Online

משלי 11 - כֶּתֶר אֲרָם צוֹבָא - Tanah Aleppo Codex bible

משלי 11

¹א מאזני מרמה תועבת יהוה ואבן שלמה רצונו

²ב בא-זדון ויבא קלון ואת-צנועים חכמה

³ג תמת ישרים תנחם וסלף בגדים ושדם (ישדם)

⁴ד לא-יועיל הון ביום עברה וצדקה תציל ממות

⁵ה צדקת תמים תישר דרכו וברשעתו יפל רשע

⁶ו צדקת ישרים תצילם ובהות בגדים ילכדו

⁷ז במות אדם רשע תאבד תקוה ותוחלת אונים אבדה

⁸ח צדיק מצרה נחלץ ויבא רשע תחתיו

⁹ט בפה--חנף ישחת רעהו ובדעת צדיקים יחלצו

¹⁰י בטוב צדיקים תעלץ קריה ובאבד רשעים רנה

¹¹יא בברכת ישרים תרום קרת ובפי רשעים תהרס

¹²יב בז-לרעהו חסר-לב ואיש תבונות יחריש

¹³יג הולך רכיל מגלה-סוד ונאמן-רוח מכסה דבר

¹⁴יד באין תחבלות יפל-עם ותשועה ברב יועץ

¹⁵טו רע-ירוע כי-ערב זר ושנא תקעים בוטח

¹⁶טז אשת-חן תתמך כבוד ועריצים יתמכו-עשר

¹⁷יז גמל נפשו איש חסד ועכר שארו אכזרי

¹⁸יח רשע--עשה פעלת-שקר וזרע צדקה שכר אמת

¹⁹יט כן-צדקה לחיים ומרדף רעה למותו

²⁰כ תועבת יהוה עקשי-לב ורצונו תמימי דרך

²¹כא יד ליד לא-ינקה רע וזרע צדיקים נמלט

²²כב נזם זהב באף חזיר-- אשה יפה וסרת טעם

²³כג תאות צדיקים אך-טוב תקות רשעים עברה

²⁴כד יש מפזר ונוסף עוד וחשך מישר אך-למחסור

²⁵כה נפש-ברכה תדשן ומרוה גם-הוא יורא

²⁶כו מנע בר יקבהו לאום וברכה לראש משביר

²⁷כז שחר טוב יבקש רצון ודרש רעה תבואנו

²⁸כח בוטח בעשרו הוא יפול וכעלה צדיקים יפרחו

²⁹כט עכר ביתו ינחל-רוח ועבד אויל לחכם-לב

³⁰ל פרי-צדיק עץ חיים ולקח נפשות חכם

³¹לא הן צדיק בארץ ישלם אף כי-רשע וחוטא