Read כֶּתֶר אֲרָם צוֹבָא - Tanah Aleppo Codex משלי 12 Bible Online

משלי 12 - כֶּתֶר אֲרָם צוֹבָא - Tanah Aleppo Codex bible

משלי 12

¹א אהב מוסר אהב דעת ושונא תוכחת בער

²ב טוב--יפיק רצון מיהוה ואיש מזמות ירשיע

³ג לא-יכון אדם ברשע ושרש צדיקים בל-ימוט

⁴ד אשת-חיל עטרת בעלה וכרקב בעצמותיו מבישה

⁵ה מחשבות צדיקים משפט תחבלות רשעים מרמה

⁶ו דברי רשעים ארב-דם ופי ישרים יצילם

⁷ז הפוך רשעים ואינם ובית צדיקים יעמד

⁸ח לפי-שכלו יהלל-איש ונעוה-לב יהיה לבוז

⁹ט טוב נקלה ועבד לו-- ממתכבד וחסר-לחם

¹⁰י יודע צדיק נפש בהמתו ורחמי רשעים אכזרי

¹¹יא עבד אדמתו ישבע-לחם ומרדף ריקים חסר-לב

¹²יב חמד רשע מצוד רעים ושרש צדיקים יתן

¹³יג בפשע שפתים מוקש רע ויצא מצרה צדיק

¹⁴יד מפרי פי-איש ישבע-טוב וגמול ידי-אדם ישוב (ישיב) לו

¹⁵טו דרך אויל ישר בעיניו ושמע לעצה חכם

¹⁶טז אויל--ביום יודע כעסו וכסה קלון ערום

¹⁷יז יפיח אמונה יגיד צדק ועד שקרים מרמה

¹⁸יח יש בוטה כמדקרות חרב ולשון חכמים מרפא

¹⁹יט שפת-אמת תכון לעד ועד-ארגיעה לשון שקר

²⁰כ מרמה בלב-חרשי רע וליעצי שלום שמחה

²¹כא לא-יאנה לצדיק כל-און ורשעים מלאו רע

²²כב תועבת יהוה שפתי-שקר ועשי אמונה רצונו

²³כג אדם ערום כסה דעת ולב כסילים יקרא אולת

²⁴כד יד-חרוצים תמשול ורמיה תהיה למס

²⁵כה דאגה בלב-איש ישחנה ודבר טוב ישמחנה

²⁶כו יתר מרעהו צדיק ודרך רשעים תתעם

²⁷כז לא-יחרך רמיה צידו והון-אדם יקר חרוץ

²⁸כח בארח-צדקה חיים ודרך נתיבה אל-מות