Read כֶּתֶר אֲרָם צוֹבָא - Tanah Aleppo Codex משלי 13 Bible Online

משלי 13 - כֶּתֶר אֲרָם צוֹבָא - Tanah Aleppo Codex bible

משלי 13

¹א בן חכם מוסר אב ולץ לא-שמע גערה

²ב מפרי פי-איש יאכל טוב ונפש בגדים חמס

³ג נצר פיו שמר נפשו פשק שפתיו מחתה-לו

⁴ד מתאוה ואין נפשו עצל ונפש חרצים תדשן

⁵ה דבר-שקר ישנא צדיק ורשע יבאיש ויחפיר

⁶ו צדקה תצר תם-דרך ורשעה תסלף חטאת

⁷ז יש מתעשר ואין כל מתרושש והון רב

⁸ח כפר נפש-איש עשרו ורש לא-שמע גערה

⁹ט אור-צדיקים ישמח ונר רשעים ידעך

¹⁰י רק-בזדון יתן מצה ואת-נועצים חכמה

¹¹יא הון מהבל ימעט וקבץ על-יד ירבה

¹²יב תוחלת ממשכה מחלה-לב ועץ חיים תאוה באה

¹³יג בז לדבר יחבל לו וירא מצוה הוא ישלם

¹⁴יד תורת חכם מקור חיים-- לסור ממקשי מות

¹⁵טו שכל-טוב יתן-חן ודרך בגדים איתן

¹⁶טז כל-ערום יעשה בדעת וכסיל יפרש אולת

¹⁷יז מלאך רשע יפל ברע וציר אמונים מרפא

¹⁸יח ריש וקלון פורע מוסר ושמר תוכחת יכבד

¹⁹יט תאוה נהיה תערב לנפש ותועבת כסילים סור מרע

²⁰כ הלוך (הולך) את-חכמים וחכם (יחכם) ורעה כסילים ירוע

²¹כא חטאים תרדף רעה ואת-צדיקים ישלם-טוב

²²כב טוב--ינחיל בני-בנים וצפון לצדיק חיל חוטא

²³כג רב-אכל ניר ראשים ויש נספה בלא משפט

²⁴כד חושך שבטו שונא בנו ואהבו שחרו מוסר

²⁵כה צדיק--אכל לשבע נפשו ובטן רשעים תחסר