Read כֶּתֶר אֲרָם צוֹבָא - Tanah Aleppo Codex משלי 14 Bible Online

משלי 14 - כֶּתֶר אֲרָם צוֹבָא - Tanah Aleppo Codex bible

משלי 14

¹א חכמות נשים בנתה ביתה ואולת בידיה תהרסנו

²ב הולך בישרו ירא יהוה ונלוז דרכיו בוזהו

³ג בפי-אויל חטר גאוה ושפתי חכמים תשמורם

⁴ד באין אלפים אבוס בר ורב-תבואות בכח שור

⁵ה עד אמונים לא יכזב ויפיח כזבים עד שקר

⁶ו בקש-לץ חכמה ואין ודעת לנבון נקל

⁷ז לך מנגד לאיש כסיל ובל-ידעת שפתי-דעת

⁸ח חכמת ערום הבין דרכו ואולת כסילים מרמה

⁹ט אולים יליץ אשם ובין ישרים רצון

¹⁰י לב--יודע מרת נפשו ובשמחתו לא-יתערב זר

¹¹יא בית רשעים ישמד ואהל ישרים יפריח

¹²יב יש דרך ישר לפני-איש ואחריתה דרכי-מות

¹³יג גם-בשחק יכאב-לב ואחריתה שמחה תוגה

¹⁴יד מדרכיו ישבע סוג לב ומעליו איש טוב

¹⁵טו פתי יאמין לכל-דבר וערום יבין לאשרו

¹⁶טז חכם ירא וסר מרע וכסיל מתעבר ובוטח

¹⁷יז קצר-אפים יעשה אולת ואיש מזמות ישנא

¹⁸יח נחלו פתאים אולת וערומים יכתרו דעת

¹⁹יט שחו רעים לפני טובים ורשעים על-שערי צדיק

²⁰כ גם-לרעהו ישנא רש ואהבי עשיר רבים

²¹כא בז-לרעהו חוטא ומחונן עניים (ענוים) אשריו

²²כב הלוא-יתעו חרשי רע וחסד ואמת חרשי טוב

²³כג בכל-עצב יהיה מותר ודבר-שפתים אך-למחסור

²⁴כד עטרת חכמים עשרם אולת כסילים אולת

²⁵כה מציל נפשות עד אמת ויפח כזבים מרמה

²⁶כו ביראת יהוה מבטח-עז ולבניו יהיה מחסה

²⁷כז יראת יהוה מקור חיים-- לסור ממקשי מות

²⁸כח ברב-עם הדרת-מלך ובאפס לאם מחתת רזון

²⁹כט ארך אפים רב-תבונה וקצר-רוח מרים אולת

³⁰ל חיי בשרים לב מרפא ורקב עצמות קנאה

³¹לא עשק דל חרף עשהו ומכבדו חנן אביון

³²לב ברעתו ידחה רשע וחסה במותו צדיק

³³לג בלב נבון תנוח חכמה ובקרב כסילים תודע

³⁴לד צדקה תרומם-גוי וחסד לאמים חטאת

³⁵לה רצון-מלך לעבד משכיל ועברתו תהיה מביש