Read כֶּתֶר אֲרָם צוֹבָא - Tanah Aleppo Codex משלי 15 Bible Online

משלי 15 - כֶּתֶר אֲרָם צוֹבָא - Tanah Aleppo Codex bible

משלי 15

¹א מענה-רך ישיב חמה ודבר-עצב יעלה-אף

²ב לשון חכמים תיטיב דעת ופי כסילים יביע אולת

³ג בכל-מקום עיני יהוה צפות רעים וטובים

⁴ד מרפא לשון עץ חיים וסלף בה שבר ברוח

⁵ה אויל--ינאץ מוסר אביו ושמר תוכחת יערים

⁶ו בית צדיק חסן רב ובתבואת רשע נעכרת

⁷ז שפתי חכמים יזרו דעת ולב כסילים לא-כן

⁸ח זבח רשעים תועבת יהוה ותפלת ישרים רצונו

⁹ט תועבת יהוה דרך רשע ומרדף צדקה יאהב

¹⁰י מוסר רע לעזב ארח שונא תוכחת ימות

¹¹יא שאול ואבדון נגד יהוה אף כי-לבות בני-אדם

¹²יב לא יאהב-לץ הוכח לו אל-חכמים לא ילך

¹³יג לב שמח ייטב פנים ובעצבת-לב רוח נכאה

¹⁴יד לב נבון יבקש-דעת ופני (ופי) כסילים ירעה אולת

¹⁵טו כל-ימי עני רעים וטוב-לב משתה תמיד

¹⁶טז טוב-מעט ביראת יהוה-- מאוצר רב ומהומה בו

¹⁷יז טוב ארחת ירק ואהבה-שם-- משור אבוס ושנאה-בו

¹⁸יח איש חמה יגרה מדון וארך אפים ישקיט ריב

¹⁹יט דרך עצל כמשכת חדק וארח ישרים סללה

²⁰כ בן חכם ישמח-אב וכסיל אדם בוזה אמו

²¹כא אולת שמחה לחסר-לב ואיש תבונה יישר-לכת

²²כב הפר מחשבות באין סוד וברב יועצים תקום

²³כג שמחה לאיש במענה-פיו ודבר בעתו מה-טוב

²⁴כד ארח חיים למעלה למשכיל-- למען סור משאול מטה

²⁵כה בית גאים יסח יהוה ויצב גבול אלמנה

²⁶כו תועבת יהוה מחשבות רע וטהרים אמרי-נעם

²⁷כז עכר ביתו בוצע בצע ושונא מתנת יחיה

²⁸כח לב צדיק יהגה לענות ופי רשעים יביע רעות

²⁹כט רחוק יהוה מרשעים ותפלת צדיקים ישמע

³⁰ל מאור-עינים ישמח-לב שמועה טובה תדשן-עצם

³¹לא אזן--שמעת תוכחת חיים בקרב חכמים תלין

³²לב פורע מוסר מואס נפשו ושומע תוכחת קונה לב

³³לג יראת יהוה מוסר חכמה ולפני כבוד ענוה