Read כֶּתֶר אֲרָם צוֹבָא - Tanah Aleppo Codex משלי 16 Bible Online

משלי 16 - כֶּתֶר אֲרָם צוֹבָא - Tanah Aleppo Codex bible

משלי 16

¹א לאדם מערכי-לב ומיהוה מענה לשון

²ב כל-דרכי-איש זך בעיניו ותכן רוחות יהוה

³ג גל אל-יהוה מעשיך ויכנו מחשבתיך

⁴ד כל פעל יהוה למענהו וגם-רשע ליום רעה

⁵ה תועבת יהוה כל-גבה-לב יד ליד לא ינקה

⁶ו בחסד ואמת יכפר עון וביראת יהוה סור מרע

⁷ז ברצות יהוה דרכי-איש גם-אויביו ישלם אתו

⁸ח טוב-מעט בצדקה-- מרב תבואות בלא משפט

⁹ט לב אדם יחשב דרכו ויהוה יכין צעדו

¹⁰י קסם על-שפתי-מלך במשפט לא ימעל-פיו

¹¹יא פלס ומאזני משפט--ליהוה מעשהו כל-אבני-כיס

¹²יב תועבת מלכים עשות רשע כי בצדקה יכון כסא

¹³יג רצון מלכים שפתי-צדק ודבר ישרים יאהב

¹⁴יד חמת-מלך מלאכי-מות ואיש חכם יכפרנה

¹⁵טו באור-פני-מלך חיים ורצונו כעב מלקוש

¹⁶טז קנה-חכמה--מה-טוב מחרוץ וקנות בינה נבחר מכסף

¹⁷יז מסלת ישרים סור מרע שמר נפשו נצר דרכו

¹⁸יח לפני-שבר גאון ולפני כשלון גבה רוח

¹⁹יט טוב שפל-רוח את-עניים (ענוים) מחלק שלל את-גאים

²⁰כ משכיל על-דבר ימצא-טוב ובוטח ביהוה אשריו

²¹כא לחכם-לב יקרא נבון ומתק שפתים יסיף לקח

²²כב מקור חיים שכל בעליו ומוסר אולים אולת

²³כג לב חכם ישכיל פיהו ועל-שפתיו יסיף לקח

²⁴כד צוף-דבש אמרי-נעם מתוק לנפש ומרפא לעצם

²⁵כה יש דרך ישר לפני-איש ואחריתה דרכי-מות

²⁶כו נפש עמל עמלה לו כי-אכף עליו פיהו

²⁷כז איש בליעל כרה רעה ועל-שפתיו (שפתו) כאש צרבת

²⁸כח איש תהפכות ישלח מדון ונרגן מפריד אלוף

²⁹כט איש חמס יפתה רעהו והוליכו בדרך לא-טוב

³⁰ל עצה עיניו לחשב תהפכות קרץ שפתיו כלה רעה

³¹לא עטרת תפארת שיבה בדרך צדקה תמצא

³²לב טוב ארך אפים מגבור ומשל ברוחו מלכד עיר

³³לג בחיק יוטל את-הגורל ומיהוה כל-משפטו