Read כֶּתֶר אֲרָם צוֹבָא - Tanah Aleppo Codex משלי 17 Bible Online

משלי 17 - כֶּתֶר אֲרָם צוֹבָא - Tanah Aleppo Codex bible

משלי 17

¹א טוב פת חרבה ושלוה-בה-- מבית מלא זבחי-ריב

²ב עבד-משכיל--ימשל בבן מביש ובתוך אחים יחלק נחלה

³ג מצרף לכסף וכור לזהב ובחן לבות יהוה

⁴ד מרע מקשיב על-שפת-און שקר מזין על-לשון הות

⁵ה לעג לרש חרף עשהו שמח לאיד לא ינקה

⁶ו עטרת זקנים בני בנים ותפארת בנים אבותם

⁷ז לא-נאוה לנבל שפת-יתר אף כי-לנדיב שפת-שקר

⁸ח אבן-חן השחד בעיני בעליו אל-כל-אשר יפנה ישכיל

⁹ט מכסה-פשע מבקש אהבה ושנה בדבר מפריד אלוף

¹⁰י תחת גערה במבין-- מהכות כסיל מאה

¹¹יא אך-מרי יבקש-רע ומלאך אכזרי ישלח-בו

¹²יב פגוש דב שכול באיש ואל-כסיל באולתו

¹³יג משיב רעה תחת טובה-- לא-תמיש (תמוש) רעה מביתו

¹⁴יד פוטר מים ראשית מדון ולפני התגלע הריב נטוש

¹⁵טו מצדיק רשע ומרשיע צדיק-- תועבת יהוה גם-שניהם

¹⁶טז למה-זה מחיר ביד-כסיל-- לקנות חכמה ולב-אין

¹⁷יז בכל-עת אהב הרע ואח לצרה יולד

¹⁸יח אדם חסר-לב תוקע כף ערב ערבה לפני רעהו

¹⁹יט אהב פשע אהב מצה מגביה פתחו מבקש-שבר

²⁰כ עקש-לב לא ימצא-טוב ונהפך בלשונו יפול ברעה

²¹כא ילד כסיל לתוגה לו ולא-ישמח אבי נבל

²²כב לב שמח ייטיב גהה ורוח נכאה תיבש-גרם

²³כג שחד מחק רשע יקח-- להטות ארחות משפט

²⁴כד את-פני מבין חכמה ועיני כסיל בקצה-ארץ

²⁵כה כעס לאביו בן כסיל וממר ליולדתו

²⁶כו גם ענוש לצדיק לא-טוב-- להכות נדיבים על-ישר

²⁷כז חושך אמריו יודע דעת וקר- (יקר-) רוח איש תבונה

²⁸כח גם אויל מחריש חכם יחשב אטם שפתיו נבון