Read כֶּתֶר אֲרָם צוֹבָא - Tanah Aleppo Codex משלי 18 Bible Online

משלי 18 - כֶּתֶר אֲרָם צוֹבָא - Tanah Aleppo Codex bible

משלי 18

¹א לתאוה יבקש נפרד בכל-תושיה יתגלע

²ב לא-יחפץ כסיל בתבונה כי אם-בהתגלות לבו

³ג בבוא-רשע בא גם-בוז ועם-קלון חרפה

⁴ד מים עמקים דברי פי-איש נחל נבע מקור חכמה

⁵ה שאת פני-רשע לא-טוב-- להטות צדיק במשפט

⁶ו שפתי כסיל יבאו בריב ופיו למהלמות יקרא

⁷ז פי-כסיל מחתה-לו ושפתיו מוקש נפשו

⁸ח דברי נרגן כמתלהמים והם ירדו חדרי-בטן

⁹ט גם מתרפה במלאכתו-- אח הוא לבעל משחית

¹⁰י מגדל-עז שם יהוה בו-ירוץ צדיק ונשגב

¹¹יא הון עשיר קרית עזו וכחומה נשגבה במשכתו

¹²יב לפני-שבר יגבה לב-איש ולפני כבוד ענוה

¹³יג משיב דבר בטרם ישמע-- אולת היא-לו וכלמה

¹⁴יד רוח-איש יכלכל מחלהו ורוח נכאה מי ישאנה

¹⁵טו לב נבון יקנה-דעת ואזן חכמים תבקש-דעת

¹⁶טז מתן אדם ירחיב לו ולפני גדלים ינחנו

¹⁷יז צדיק הראשון בריבו יבא- (ובא-) רעהו וחקרו

¹⁸יח מדינים ישבית הגורל ובין עצומים יפריד

¹⁹יט אח--נפשע מקרית-עז ומדונים (ומדינים) כבריח ארמון

²⁰כ מפרי פי-איש תשבע בטנו תבואת שפתיו ישבע

²¹כא מות וחיים ביד-לשון ואהביה יאכל פריה

²²כב מצא אשה מצא טוב ויפק רצון מיהוה

²³כג תחנונים ידבר-רש ועשיר יענה עזות

²⁴כד איש רעים להתרעע ויש אהב דבק מאח