Read כֶּתֶר אֲרָם צוֹבָא - Tanah Aleppo Codex משלי 19 Bible Online

משלי 19 - כֶּתֶר אֲרָם צוֹבָא - Tanah Aleppo Codex bible

משלי 19

¹א טוב-רש הולך בתמו-- מעקש שפתיו והוא כסיל

²ב גם בלא-דעת נפש לא-טוב ואץ ברגלים חוטא

³ג אולת אדם תסלף דרכו ועל-יהוה יזעף לבו

⁴ד הון--יסיף רעים רבים ודל מרעהו יפרד

⁵ה עד שקרים לא ינקה ויפיח כזבים לא ימלט

⁶ו רבים יחלו פני-נדיב וכל-הרע לאיש מתן

⁷ז כל אחי-רש שנאהו-- אף כי מרעהו רחקו ממנו מרדף אמרים לא- (לו-) המה

⁸ח קנה-לב אהב נפשו שמר תבונה למצא-טוב

⁹ט עד שקרים לא ינקה ויפיח כזבים יאבד

¹⁰י לא-נאוה לכסיל תענוג אף כי-לעבד משל בשרים

¹¹יא שכל אדם האריך אפו ותפארתו עבר על-פשע

¹²יב נהם ככפיר זעף מלך וכטל על-עשב רצונו

¹³יג הות לאביו בן כסיל ודלף טרד מדיני אשה

¹⁴יד בית והון נחלת אבות ומיהוה אשה משכלת

¹⁵טו עצלה תפיל תרדמה ונפש רמיה תרעב

¹⁶טז שמר מצוה שמר נפשו בוזה דרכיו יומת (ימות)

¹⁷יז מלוה יהוה חונן דל וגמלו ישלם-לו

¹⁸יח יסר בנך כי-יש תקוה ואל-המיתו אל-תשא נפשך

¹⁹יט גרל- (גדל-) חמה נשא ענש כי אם-תציל ועוד תוסף

²⁰כ שמע עצה וקבל מוסר-- למען תחכם באחריתך

²¹כא רבות מחשבות בלב-איש ועצת יהוה היא תקום

²²כב תאות אדם חסדו וטוב-רש מאיש כזב

²³כג יראת יהוה לחיים ושבע ילין בל-יפקד רע

²⁴כד טמן עצל ידו בצלחת גם-אל-פיהו לא ישיבנה

²⁵כה לץ תכה ופתי יערם והוכיח לנבון יבין דעת

²⁶כו משדד-אב יבריח אם-- בן מביש ומחפיר

²⁷כז חדל-בני לשמע מוסר לשגות מאמרי-דעת

²⁸כח עד בליעל יליץ משפט ופי רשעים יבלע-און

²⁹כט נכונו ללצים שפטים ומהלמות לגו כסילים