Read כֶּתֶר אֲרָם צוֹבָא - Tanah Aleppo Codex משלי 2 Bible Online

משלי 2 - כֶּתֶר אֲרָם צוֹבָא - Tanah Aleppo Codex bible

משלי 2

¹א בני אם-תקח אמרי ומצותי תצפן אתך

²ב להקשיב לחכמה אזנך תטה לבך לתבונה

³ג כי אם לבינה תקרא לתבונה תתן קולך

⁴ד אם-תבקשנה ככסף וכמטמונים תחפשנה

⁵ה אז--תבין יראת יהוה ודעת אלהים תמצא

⁶ו כי-יהוה יתן חכמה מפיו דעת ותבונה

⁷ז וצפן (יצפן) לישרים תושיה מגן להלכי תם

⁸ח לנצר ארחות משפט ודרך חסידו ישמר

⁹ט אז--תבין צדק ומשפט ומישרים כל-מעגל-טוב

¹⁰י כי-תבוא חכמה בלבך ודעת לנפשך ינעם

¹¹יא מזמה תשמר עליך תבונה תנצרכה

¹²יב להצילך מדרך רע מאיש מדבר תהפכות

¹³יג העזבים ארחות ישר-- ללכת בדרכי-חשך

¹⁴יד השמחים לעשות רע יגילו בתהפכות רע

¹⁵טו אשר ארחתיהם עקשים ונלוזים במעגלותם

¹⁶טז להצילך מאשה זרה מנכריה אמריה החליקה

¹⁷יז העזבת אלוף נעוריה ואת-ברית אלהיה שכחה

¹⁸יח כי שחה אל-מות ביתה ואל-רפאים מעגלתיה

¹⁹יט כל-באיה לא ישובון ולא-ישיגו ארחות חיים

²⁰כ למען--תלך בדרך טובים וארחות צדיקים תשמר

²¹כא כי-ישרים ישכנו-ארץ ותמימים יותרו בה

²²כב ורשעים מארץ יכרתו ובוגדים יסחו ממנה