Read כֶּתֶר אֲרָם צוֹבָא - Tanah Aleppo Codex משלי 20 Bible Online

משלי 20 - כֶּתֶר אֲרָם צוֹבָא - Tanah Aleppo Codex bible

משלי 20

¹א לץ היין המה שכר וכל-שגה בו לא יחכם

²ב נהם ככפיר אימת מלך מתעברו חוטא נפשו

³ג כבוד לאיש שבת מריב וכל-אויל יתגלע

⁴ד מחרף עצל לא-יחרש ישאל (ושאל) בקציר ואין

⁵ה מים עמקים עצה בלב-איש ואיש תבונה ידלנה

⁶ו רב-אדם--יקרא איש חסדו ואיש אמונים מי ימצא

⁷ז מתהלך בתמו צדיק אשרי בניו אחריו

⁸ח מלך יושב על-כסא-דין-- מזרה בעיניו כל-רע

⁹ט מי-יאמר זכיתי לבי טהרתי מחטאתי

¹⁰י אבן ואבן איפה ואיפה-- תועבת יהוה גם-שניהם

¹¹יא גם במעלליו יתנכר-נער-- אם-זך ואם-ישר פעלו

¹²יב אזן שמעת ועין ראה-- יהוה עשה גם-שניהם

¹³יג אל-תאהב שנה פן-תורש פקח עיניך שבע-לחם

¹⁴יד רע רע יאמר הקונה ואזל לו אז יתהלל

¹⁵טו יש זהב ורב-פנינים וכלי יקר שפתי-דעת

¹⁶טז לקח-בגדו כי-ערב זר ובעד נכרים (נכריה) חבלהו

¹⁷יז ערב לאיש לחם שקר ואחר ימלא-פיהו חצץ

¹⁸יח מחשבות בעצה תכון ובתחבלות עשה מלחמה

¹⁹יט גולה-סוד הולך רכיל ולפתה שפתיו לא תתערב

²⁰כ מקלל אביו ואמו-- ידעך נרו באישון (באשון) חשך

²¹כא נחלה מבחלת (מבהלת) בראשונה ואחריתה לא תברך

²²כב אל-תאמר אשלמה-רע קוה ליהוה וישע לך

²³כג תועבת יהוה אבן ואבן ומאזני מרמה לא-טוב

²⁴כד מיהוה מצעדי-גבר ואדם מה-יבין דרכו

²⁵כה מוקש אדם ילע קדש ואחר נדרים לבקר

²⁶כו מזרה רשעים מלך חכם וישב עליהם אופן

²⁷כז נר יהוה נשמת אדם חפש כל-חדרי-בטן

²⁸כח חסד ואמת יצרו-מלך וסעד בחסד כסאו

²⁹כט תפארת בחורים כחם והדר זקנים שיבה

³⁰ל חברות פצע תמריק (תמרוק) ברע ומכות חדרי-בטן