Read כֶּתֶר אֲרָם צוֹבָא - Tanah Aleppo Codex משלי 21 Bible Online

משלי 21 - כֶּתֶר אֲרָם צוֹבָא - Tanah Aleppo Codex bible

משלי 21

¹א פלגי-מים לב-מלך ביד-יהוה על-כל-אשר יחפץ יטנו

²ב כל-דרך-איש ישר בעיניו ותכן לבות יהוה

³ג עשה צדקה ומשפט-- נבחר ליהוה מזבח

⁴ד רום-עינים ורחב-לב-- נר רשעים חטאת

⁵ה מחשבות חרוץ אך-למותר וכל-אץ אך-למחסור

⁶ו פעל אצרות בלשון שקר-- הבל נדף מבקשי-מות

⁷ז שד-רשעים יגורם כי מאנו לעשות משפט

⁸ח הפכפך דרך איש וזר וזך ישר פעלו

⁹ט טוב לשבת על-פנת-גג-- מאשת מדינים ובית חבר

¹⁰י נפש רשע אותה-רע לא-יחן בעיניו רעהו

¹¹יא בענש-לץ יחכם-פתי ובהשכיל לחכם יקח-דעת

¹²יב משכיל צדיק לבית רשע מסלף רשעים לרע

¹³יג אטם אזנו מזעקת-דל-- גם-הוא יקרא ולא יענה

¹⁴יד מתן בסתר יכפה-אף ושחד בחק חמה עזה

¹⁵טו שמחה לצדיק עשות משפט ומחתה לפעלי און

¹⁶טז אדם--תועה מדרך השכל בקהל רפאים ינוח

¹⁷יז איש מחסור אהב שמחה אהב יין-ושמן לא יעשיר

¹⁸יח כפר לצדיק רשע ותחת ישרים בוגד

¹⁹יט טוב שבת בארץ-מדבר-- מאשת מדונים (מדינים) וכעס

²⁰כ אוצר נחמד ושמן--בנוה חכם וכסיל אדם יבלענו

²¹כא רדף צדקה וחסד-- ימצא חיים צדקה וכבוד

²²כב עיר גברים עלה חכם וירד עז מבטחה

²³כג שמר פיו ולשונו-- שמר מצרות נפשו

²⁴כד זד יהיר לץ שמו-- עושה בעברת זדון

²⁵כה תאות עצל תמיתנו כי-מאנו ידיו לעשות

²⁶כו כל-היום התאוה תאוה וצדיק יתן ולא יחשך

²⁷כז זבח רשעים תועבה אף כי-בזמה יביאנו

²⁸כח עד-כזבים יאבד ואיש שומע לנצח ידבר

²⁹כט העז איש רשע בפניו וישר הוא יכין דרכיו (יבין דרכו)

³⁰ל אין חכמה ואין תבונה-- ואין עצה לנגד יהוה

³¹לא סוס--מוכן ליום מלחמה וליהוה התשועה