Read כֶּתֶר אֲרָם צוֹבָא - Tanah Aleppo Codex משלי 22 Bible Online

משלי 22 - כֶּתֶר אֲרָם צוֹבָא - Tanah Aleppo Codex bible

משלי 22

¹א נבחר שם מעשר רב מכסף ומזהב חן טוב

²ב עשיר ורש נפגשו עשה כלם יהוה

³ג ערום ראה רעה ויסתר (ונסתר) ופתיים עברו ונענשו

⁴ד עקב ענוה יראת יהוה עשר וכבוד וחיים

⁵ה צנים פחים בדרך עקש שומר נפשו ירחק מהם

⁶ו חנך לנער על-פי דרכו-- גם כי-יזקין לא-יסור ממנה

⁷ז עשיר ברשים ימשול ועבד לוה לאיש מלוה

⁸ח זורע עולה יקצור- (יקצר-) און ושבט עברתו יכלה

⁹ט טוב-עין הוא יברך כי-נתן מלחמו לדל

¹⁰י גרש לץ ויצא מדון וישבת דין וקלון

¹¹יא אהב טהור- (טהר-) לב-- חן שפתיו רעהו מלך

¹²יב עיני יהוה נצרו דעת ויסלף דברי בגד

¹³יג אמר עצל ארי בחוץ בתוך רחבות ארצח

¹⁴יד שוחה עמקה פי זרות זעום יהוה יפול- (יפל-) שם

¹⁵טו אולת קשורה בלב-נער שבט מוסר ירחיקנה ממנו

¹⁶טז עשק דל להרבות לו-- נתן לעשיר אך-למחסור

¹⁷יז הט אזנך--ושמע דברי חכמים ולבך תשית לדעתי

¹⁸יח כי-נעים כי-תשמרם בבטנך יכנו יחדו על-שפתיך

¹⁹יט להיות ביהוה מבטחך-- הודעתיך היום אף-אתה

²⁰כ הלא כתבתי לך שלשום (שלשים)-- במעצות ודעת

²¹כא להודיעך--קשט אמרי אמת להשיב אמרים אמת לשלחיך

²²כב אל-תגזל-דל כי דל-הוא ואל-תדכא עני בשער

²³כג כי-יהוה יריב ריבם וקבע את-קבעיהם נפש

²⁴כד אל-תתרע את-בעל אף ואת-איש חמות לא תבוא

²⁵כה פן-תאלף ארחתו ולקחת מוקש לנפשך

²⁶כו אל-תהי בתקעי-כף בערבים משאות

²⁷כז אם-אין-לך לשלם-- למה יקח משכבך מתחתיך

²⁸כח אל-תסג גבול עולם-- אשר עשו אבותיך

²⁹כט חזית איש מהיר במלאכתו-- לפני-מלכים יתיצב בל-יתיצב לפני חשכים