Read כֶּתֶר אֲרָם צוֹבָא - Tanah Aleppo Codex משלי 23 Bible Online

משלי 23 - כֶּתֶר אֲרָם צוֹבָא - Tanah Aleppo Codex bible

משלי 23

¹א כי-תשב ללחום את-מושל-- בין תבין את-אשר לפניך

²ב ושמת שכין בלעך-- אם-בעל נפש אתה

³ג אל-תתאו למטעמותיו והוא לחם כזבים

⁴ד אל-תיגע להעשיר מבינתך חדל

⁵ה התעוף (התעיף) עיניך בו ואיננו כי עשה יעשה-לו כנפים כנשר ועיף (יעוף) השמים

⁶ו אל-תלחם--את-לחם רע עין ואל-תתאו למטעמתיו

⁷ז כי כמו שער בנפשו-- כן-הוא אכול ושתה יאמר לך ולבו בל-עמך

⁸ח פתך-אכלת תקיאנה ושחת דבריך הנעימים

⁹ט באזני כסיל אל-תדבר כי-יבוז לשכל מליך

¹⁰י אל-תסג גבול עולם ובשדי יתומים אל-תבא

¹¹יא כי-גאלם חזק הוא-יריב את-ריבם אתך

¹²יב הביאה למוסר לבך ואזנך לאמרי-דעת

¹³יג אל-תמנע מנער מוסר כי-תכנו בשבט לא ימות

¹⁴יד אתה בשבט תכנו ונפשו משאול תציל

¹⁵טו בני אם-חכם לבך-- ישמח לבי גם-אני

¹⁶טז ותעלזנה כליותי-- בדבר שפתיך מישרים

¹⁷יז אל-יקנא לבך בחטאים כי אם-ביראת-יהוה כל-היום

¹⁸יח כי אם-יש אחרית ותקותך לא תכרת

¹⁹יט שמע-אתה בני וחכם ואשר בדרך לבך

²⁰כ אל-תהי בסבאי-יין-- בזללי בשר למו

²¹כא כי-סבא וזולל יורש וקרעים תלביש נומה

²²כב שמע לאביך זה ילדך ואל-תבוז כי-זקנה אמך

²³כג אמת קנה ואל-תמכר חכמה ומוסר ובינה

²⁴כד גול (גיל) יגיל אבי צדיק יולד (ויולד) חכם וישמח- (ישמח-) בו

²⁵כה ישמח-אביך ואמך ותגל יולדתך

²⁶כו תנה-בני לבך לי ועיניך דרכי תרצנה (תצרנה)

²⁷כז כי-שוחה עמקה זונה ובאר צרה נכריה

²⁸כח אף-היא כחתף תארב ובוגדים באדם תוסף

²⁹כט למי אוי למי אבוי למי מדונים (מדינים) למי שיח-- למי פצעים חנם למי חכללות עינים

³⁰ל למאחרים על-היין-- לבאים לחקר ממסך

³¹לא אל-תרא יין כי יתאדם כי-יתן בכיס (בכוס) עינו יתהלך במישרים

³²לב אחריתו כנחש ישך וכצפעני יפרש

³³לג עיניך יראו זרות ולבך ידבר תהפכות

³⁴לד והיית כשכב בלב-ים וכשכב בראש חבל

³⁵לה הכוני בל-חליתי-- הלמוני בל-ידעתי מתי אקיץ אוסיף אבקשנו עוד