Read כֶּתֶר אֲרָם צוֹבָא - Tanah Aleppo Codex משלי 24 Bible Online

משלי 24 - כֶּתֶר אֲרָם צוֹבָא - Tanah Aleppo Codex bible

משלי 24

¹א אל-תקנא באנשי רעה ואל-תתאו להיות אתם

²ב כי-שד יהגה לבם ועמל שפתיהם תדברנה

³ג בחכמה יבנה בית ובתבונה יתכונן

⁴ד ובדעת חדרים ימלאו-- כל-הון יקר ונעים

⁵ה גבר-חכם בעוז ואיש-דעת מאמץ-כח

⁶ו כי בתחבלות תעשה-לך מלחמה ותשועה ברב יועץ

⁷ז ראמות לאויל חכמות בשער לא יפתח-פיהו

⁸ח מחשב להרע-- לו בעל-מזמות יקראו

⁹ט זמת אולת חטאת ותועבת לאדם לץ

¹⁰י התרפית ביום צרה-- צר כחכה

¹¹יא הצל לקחים למות ומטים להרג אם-תחשוך

¹²יב כי-תאמר-- הן לא-ידענו-זה הלא-תכן לבות הוא-יבין ונצר נפשך הוא ידע והשיב לאדם כפעלו

¹³יג אכל-בני דבש כי-טוב ונפת מתוק על-חכך

¹⁴יד כן דעה חכמה--לנפשך אם-מצאת ויש אחרית ותקותך לא תכרת

¹⁵טו אל-תארב רשע לנוה צדיק אל-תשדד רבצו

¹⁶טז כי שבע יפול צדיק וקם ורשעים יכשלו ברעה

¹⁷יז בנפל אויביך (אויבך) אל-תשמח ובכשלו אל-יגל לבך

¹⁸יח פן-יראה יהוה ורע בעיניו והשיב מעליו אפו

¹⁹יט אל-תתחר במרעים אל-תקנא ברשעים

²⁰כ כי לא-תהיה אחרית לרע נר רשעים ידעך

²¹כא ירא-את-יהוה בני ומלך עם-שונים אל-תתערב

²²כב כי-פתאם יקום אידם ופיד שניהם מי יודע

²³כג גם-אלה לחכמים הכר-פנים במשפט בל-טוב

²⁴כד אמר לרשע--צדיק אתה יקבהו עמים יזעמוהו לאמים

²⁵כה ולמוכיחים ינעם ועליהם תבוא ברכת-טוב

²⁶כו שפתים ישק משיב דברים נכחים

²⁷כז הכן בחוץ מלאכתך--ועתדה בשדה לך אחר ובנית ביתך

²⁸כח אל-תהי עד-חנם ברעך והפתית בשפתיך

²⁹כט אל-תאמר--כאשר עשה-לי כן אעשה-לו אשיב לאיש כפעלו

³⁰ל על-שדה איש-עצל עברתי ועל-כרם אדם חסר-לב

³¹לא והנה עלה כלו קמשנים--כסו פניו חרלים וגדר אבניו נהרסה

³²לב ואחזה אנכי אשית לבי ראיתי לקחתי מוסר

³³לג מעט שנות מעט תנומות מעט חבק ידים לשכב

³⁴לד ובא-מתהלך רישך ומחסריך כאיש מגן