Read כֶּתֶר אֲרָם צוֹבָא - Tanah Aleppo Codex משלי 25 Bible Online

משלי 25 - כֶּתֶר אֲרָם צוֹבָא - Tanah Aleppo Codex bible

משלי 25

¹א גם-אלה משלי שלמה-- אשר העתיקו אנשי חזקיה מלך-יהודה

²ב כבד אלהים הסתר דבר וכבד מלכים חקר דבר

³ג שמים לרום וארץ לעמק ולב מלכים אין חקר

⁴ד הגו סיגים מכסף ויצא לצרף כלי

⁵ה הגו רשע לפני-מלך ויכון בצדק כסאו

⁶ו אל-תתהדר לפני-מלך ובמקום גדלים אל-תעמד

⁷ז כי טוב אמר-לך עלה-הנה מהשפילך לפני נדיב--אשר ראו עיניך

⁸ח אל-תצא לרב מהר פן מה-תעשה באחריתה--בהכלים אתך רעך

⁹ט ריבך ריב את-רעך וסוד אחר אל-תגל

¹⁰י פן-יחסדך שמע ודבתך לא תשוב

¹¹יא תפוחי זהב במשכיות כסף-- דבר דבר על-אפניו

¹²יב נזם זהב וחלי-כתם-- מוכיח חכם על-אזן שמעת

¹³יג כצנת שלג ביום קציר--ציר נאמן לשלחיו ונפש אדניו ישיב

¹⁴יד נשיאים ורוח וגשם אין-- איש מתהלל במתת-שקר

¹⁵טו בארך אפים יפתה קצין ולשון רכה תשבר-גרם

¹⁶טז דבש מצאת אכל דיך פן-תשבענו והקאתו

¹⁷יז הקר רגלך מבית רעך פן-ישבעך ושנאך

¹⁸יח מפיץ וחרב וחץ שנון-- איש ענה ברעהו עד שקר

¹⁹יט שן רעה ורגל מועדת-- מבטח בוגד ביום צרה

²⁰כ מעדה-בגד ביום קרה--חמץ על-נתר ושר בשרים על לב-רע

²¹כא אם-רעב שנאך האכלהו לחם ואם-צמא השקהו מים

²²כב כי גחלים--אתה חתה על-ראשו ויהוה ישלם-לך

²³כג רוח צפון תחולל גשם ופנים נזעמים לשון סתר

²⁴כד טוב שבת על-פנת-גג-- מאשת מדונים (מדינים) ובית חבר

²⁵כה מים קרים על-נפש עיפה ושמועה טובה מארץ מרחק

²⁶כו מעין נרפש ומקור משחת-- צדיק מט לפני-רשע

²⁷כז אכל דבש הרבות לא-טוב וחקר כבדם כבוד

²⁸כח עיר פרוצה אין חומה-- איש אשר אין מעצר לרוחו