Read כֶּתֶר אֲרָם צוֹבָא - Tanah Aleppo Codex משלי 27 Bible Online

משלי 27 - כֶּתֶר אֲרָם צוֹבָא - Tanah Aleppo Codex bible

משלי 27

¹א אל-תתהלל ביום מחר כי לא-תדע מה-ילד יום

²ב יהללך זר ולא-פיך נכרי ואל-שפתיך

³ג כבד-אבן ונטל החול וכעס אויל כבד משניהם

⁴ד אכזריות חמה ושטף אף ומי יעמד לפני קנאה

⁵ה טובה תוכחת מגלה-- מאהבה מסתרת

⁶ו נאמנים פצעי אוהב ונעתרות נשיקות שונא

⁷ז נפש שבעה תבוס נפת ונפש רעבה כל-מר מתוק

⁸ח כצפור נודדת מן-קנה-- כן-איש נודד ממקומו

⁹ט שמן וקטרת ישמח-לב ומתק רעהו מעצת-נפש

¹⁰י רעך ורעה (ורע) אביך אל-תעזב-- ובית אחיך אל-תבוא ביום אידך טוב שכן קרוב מאח רחוק

¹¹יא חכם בני ושמח לבי ואשיבה חרפי דבר

¹²יב ערום ראה רעה נסתר פתאים עברו נענשו

¹³יג קח-בגדו כי-ערב זר ובעד נכריה חבלהו

¹⁴יד מברך רעהו בקול גדול--בבקר השכים קללה תחשב לו

¹⁵טו דלף טורד ביום סגריר ואשת מדונים (מדינים) נשתוה

¹⁶טז צפניה צפן-רוח ושמן ימינו יקרא

¹⁷יז ברזל בברזל יחד ואיש יחד פני-רעהו

¹⁸יח נצר תאנה יאכל פריה ושמר אדניו יכבד

¹⁹יט כמים הפנים לפנים-- כן לב-האדם לאדם

²⁰כ שאול ואבדה לא תשבענה ועיני האדם לא תשבענה

²¹כא מצרף לכסף וכור לזהב ואיש לפי מהללו

²²כב אם תכתוש-את-האויל במכתש בתוך הריפות-- בעלי לא-תסור מעליו אולתו

²³כג ידע תדע פני צאנך שית לבך לעדרים

²⁴כד כי לא לעולם חסן ואם-נזר לדור דור (ודור)

²⁵כה גלה חציר ונראה-דשא ונאספו עשבות הרים

²⁶כו כבשים ללבושך ומחיר שדה עתודים

²⁷כז ודי חלב עזים--ללחמך ללחם ביתך וחיים לנערותיך