Read כֶּתֶר אֲרָם צוֹבָא - Tanah Aleppo Codex משלי 28 Bible Online

משלי 28 - כֶּתֶר אֲרָם צוֹבָא - Tanah Aleppo Codex bible

משלי 28

¹א נסו ואין-רדף רשע וצדיקים ככפיר יבטח

²ב בפשע ארץ רבים שריה ובאדם מבין ידע כן יאריך

³ג גבר-רש ועשק דלים-- מטר סחף ואין לחם

⁴ד עזבי תורה יהללו רשע ושמרי תורה יתגרו בם

⁵ה אנשי-רע לא-יבינו משפט ומבקשי יהוה יבינו כל

⁶ו טוב-רש הולך בתמו-- מעקש דרכים והוא עשיר

⁷ז נוצר תורה בן מבין ורעה זוללים יכלים אביו

⁸ח מרבה הונו בנשך ובתרבית (ותרבית)-- לחונן דלים יקבצנו

⁹ט מסיר אזנו משמע תורה-- גם תפלתו תועבה

¹⁰י משגה ישרים בדרך רע--בשחותו הוא-יפול ותמימים ינחלו-טוב

¹¹יא חכם בעיניו איש עשיר ודל מבין יחקרנו

¹²יב בעלץ צדיקים רבה תפארת ובקום רשעים יחפש אדם

¹³יג מכסה פשעיו לא יצליח ומודה ועזב ירחם

¹⁴יד אשרי אדם מפחד תמיד ומקשה לבו יפול ברעה

¹⁵טו ארי-נהם ודב שוקק-- מושל רשע על עם-דל

¹⁶טז נגיד--חסר תבונות ורב מעשקות שנאי (שנא) בצע יאריך ימים

¹⁷יז אדם עשק בדם-נפש-- עד-בור ינוס אל-יתמכו-בו

¹⁸יח הולך תמים יושע ונעקש דרכים יפול באחת

¹⁹יט עבד אדמתו ישבע-לחם ומרדף ריקים ישבע-ריש

²⁰כ איש אמונות רב-ברכות ואץ להעשיר לא ינקה

²¹כא הכר-פנים לא-טוב ועל-פת-לחם יפשע-גבר

²²כב נבהל להון--איש רע עין ולא-ידע כי-חסר יבאנו

²³כג מוכיח אדם אחרי חן ימצא-- ממחליק לשון

²⁴כד גוזל אביו ואמו--ואמר אין-פשע חבר הוא לאיש משחית

²⁵כה רחב-נפש יגרה מדון ובטח על-יהוה ידשן

²⁶כו בוטח בלבו הוא כסיל והולך בחכמה הוא ימלט

²⁷כז נותן לרש אין מחסור ומעלים עיניו רב-מארות

²⁸כח בקום רשעים יסתר אדם ובאבדם ירבו צדיקים