Read כֶּתֶר אֲרָם צוֹבָא - Tanah Aleppo Codex משלי 29 Bible Online

משלי 29 - כֶּתֶר אֲרָם צוֹבָא - Tanah Aleppo Codex bible

משלי 29

¹א איש תוכחות מקשה-ערף-- פתע ישבר ואין מרפא

²ב ברבות צדיקים ישמח העם ובמשל רשע יאנח עם

³ג איש-אהב חכמה ישמח אביו ורעה זונות יאבד-הון

⁴ד מלך--במשפט יעמיד ארץ ואיש תרומות יהרסנה

⁵ה גבר מחליק על-רעהו רשת פורש על-פעמיו

⁶ו בפשע איש רע מוקש וצדיק ירון ושמח

⁷ז ידע צדיק דין דלים רשע לא-יבין דעת

⁸ח אנשי לצון יפיחו קריה וחכמים ישיבו אף

⁹ט איש-חכם--נשפט את-איש אויל ורגז ושחק ואין נחת

¹⁰י אנשי דמים ישנאו-תם וישרים יבקשו נפשו

¹¹יא כל-רוחו יוציא כסיל וחכם באחור ישבחנה

¹²יב משל מקשיב על-דבר-שקר-- כל-משרתיו רשעים

¹³יג רש ואיש תככים נפגשו-- מאיר עיני שניהם יהוה

¹⁴יד מלך שופט באמת דלים-- כסאו לעד יכון

¹⁵טו שבט ותוכחת יתן חכמה ונער משלח מביש אמו

¹⁶טז ברבות רשעים ירבה-פשע וצדיקים במפלתם יראו

¹⁷יז יסר בנך ויניחך ויתן מעדנים לנפשך

¹⁸יח באין חזון יפרע עם ושמר תורה אשרהו

¹⁹יט בדברים לא-יוסר עבד כי-יבין ואין מענה

²⁰כ חזית--איש אץ בדבריו תקוה לכסיל ממנו

²¹כא מפנק מנער עבדו ואחריתו יהיה מנון

²²כב איש-אף יגרה מדון ובעל חמה רב-פשע

²³כג גאות אדם תשפילנו ושפל-רוח יתמך כבוד

²⁴כד חולק עם-גנב שונא נפשו אלה ישמע ולא יגיד

²⁵כה חרדת אדם יתן מוקש ובוטח ביהוה ישגב

²⁶כו רבים מבקשים פני-מושל ומיהוה משפט-איש

²⁷כז תועבת צדיקים איש עול ותועבת רשע ישר-דרך