Read כֶּתֶר אֲרָם צוֹבָא - Tanah Aleppo Codex משלי 3 Bible Online

משלי 3 - כֶּתֶר אֲרָם צוֹבָא - Tanah Aleppo Codex bible

משלי 3

¹א בני תורתי אל-תשכח ומצותי יצר לבך

²ב כי ארך ימים ושנות חיים-- ושלום יוסיפו לך

³ג חסד ואמת אל-יעזבך קשרם על-גרגרותיך כתבם על-לוח לבך

⁴ד ומצא-חן ושכל-טוב-- בעיני אלהים ואדם

⁵ה בטח אל-יהוה בכל-לבך ואל-בינתך אל-תשען

⁶ו בכל-דרכיך דעהו והוא יישר ארחתיך

⁷ז אל-תהי חכם בעיניך ירא את-יהוה וסור מרע

⁸ח רפאות תהי לשרך ושקוי לעצמותיך

⁹ט כבד את-יהוה מהונך ומראשית כל-תבואתך

¹⁰י וימלאו אסמיך שבע ותירוש יקביך יפרצו

¹¹יא מוסר יהוה בני אל-תמאס ואל-תקץ בתוכחתו

¹²יב כי את אשר יאהב יהוה יוכיח וכאב את-בן ירצה

¹³יג אשרי אדם מצא חכמה ואדם יפיק תבונה

¹⁴יד כי טוב סחרה מסחר-כסף ומחרוץ תבואתה

¹⁵טו יקרה היא מפניים (מפנינים) וכל-חפציך לא ישוו-בה

¹⁶טז ארך ימים בימינה בשמאולה עשר וכבוד

¹⁷יז דרכיה דרכי-נעם וכל-נתיבותיה שלום

¹⁸יח עץ-חיים היא למחזיקים בה ותמכיה מאשר

¹⁹יט יהוה--בחכמה יסד-ארץ כונן שמים בתבונה

²⁰כ בדעתו תהומות נבקעו ושחקים ירעפו-טל

²¹כא בני אל-ילזו מעיניך נצר תשיה ומזמה

²²כב ויהיו חיים לנפשך וחן לגרגרתיך

²³כג אז תלך לבטח דרכך ורגלך לא תגוף

²⁴כד אם-תשכב לא-תפחד ושכבת וערבה שנתך

²⁵כה אל-תירא מפחד פתאם ומשאת רשעים כי תבא

²⁶כו כי-יהוה יהיה בכסלך ושמר רגלך מלכד

²⁷כז אל-תמנע-טוב מבעליו-- בהיות לאל ידיך (ידך) לעשות

²⁸כח אל-תאמר לרעיך (לרעך) לך ושוב--ומחר אתן ויש אתך

²⁹כט אל-תחרש על-רעך רעה והוא-יושב לבטח אתך

³⁰ל אל-תרוב (תריב) עם-אדם חנם-- אם-לא גמלך רעה

³¹לא אל-תקנא באיש חמס ואל-תבחר בכל-דרכיו

³²לב כי תועבת יהוה נלוז ואת-ישרים סודו

³³לג מארת יהוה בבית רשע ונוה צדיקים יברך

³⁴לד אם-ללצים הוא-יליץ ולעניים (ולענוים) יתן-חן

³⁵לה כבוד חכמים ינחלו וכסילים מרים קלון