Read כֶּתֶר אֲרָם צוֹבָא - Tanah Aleppo Codex משלי 30 Bible Online

משלי 30 - כֶּתֶר אֲרָם צוֹבָא - Tanah Aleppo Codex bible

משלי 30

¹א דברי אגור בן-יקה--המשא נאם הגבר לאיתיאל לאיתיאל ואכל

²ב כי בער אנכי מאיש ולא-בינת אדם לי

³ג ולא-למדתי חכמה ודעת קדשים אדע

⁴ד מי עלה-שמים וירד מי אסף-רוח בחפניו מי צרר-מים בשמלה-- מי הקים כל-אפסי-ארץ מה-שמו ומה-שם-בנו כי תדע

⁵ה כל-אמרת אלוה צרופה מגן הוא לחסים בו

⁶ו אל-תוסף על-דבריו פן-יוכיח בך ונכזבת

⁷ז שתים שאלתי מאתך אל-תמנע ממני בטרם אמות

⁸ח שוא ודבר-כזב הרחק ממני-- ראש ועשר אל-תתן-לי הטריפני לחם חקי

⁹ט פן אשבע וכחשתי-- ואמרתי מי יהוה ופן-אורש וגנבתי ותפשתי שם אלהי

¹⁰י אל-תלשן עבד אל-אדנו פן-יקללך ואשמת

¹¹יא דור אביו יקלל ואת-אמו לא יברך

¹²יב דור טהור בעיניו ומצאתו לא רחץ

¹³יג דור מה-רמו עיניו ועפעפיו ינשאו

¹⁴יד דור חרבות שניו-- ומאכלות מתלעתיו לאכל עניים מארץ ואביונים מאדם

¹⁵טו לעלוקה שתי בנות-- הב הב שלוש הנה לא תשבענה ארבע לא-אמרו הון

¹⁶טז שאול ועצר-רחם ארץ לא-שבעה מים ואש לא-אמרה הון

¹⁷יז עין תלעג לאב-- ותבז ליקהת-אם יקרוה ערבי-נחל ויאכלוה בני-נשר

¹⁸יח שלשה המה נפלאו ממני וארבע (וארבעה) לא ידעתים

¹⁹יט דרך הנשר בשמים-- דרך נחש עלי-צור דרך-אניה בלב-ים-- ודרך גבר בעלמה

²⁰כ כן דרך אשה-- מנאפת אכלה ומחתה פיה ואמרה לא-פעלתי און

²¹כא תחת שלוש רגזה ארץ ותחת ארבע לא-תוכל שאת

²²כב תחת-עבד כי ימלוך ונבל כי ישבע-לחם

²³כג תחת שנואה כי תבעל ושפחה כי תירש גברתה

²⁴כד ארבעה הם קטני-ארץ והמה חכמים מחכמים

²⁵כה הנמלים עם לא-עז ויכינו בקיץ לחמם

²⁶כו שפנים עם לא-עצום וישימו בסלע ביתם

²⁷כז מלך אין לארבה ויצא חצץ כלו

²⁸כח שממית בידים תתפש והיא בהיכלי מלך

²⁹כט שלשה המה מיטיבי צעד וארבעה מיטבי לכת

³⁰ל ליש גבור בבהמה ולא-ישוב מפני-כל

³¹לא זרזיר מתנים או-תיש ומלך אלקום עמו

³²לב אם-נבלת בהתנשא ואם-זמות יד לפה

³³לג כי מיץ חלב יוציא חמאה-- ומיץ-אף יוציא דם ומיץ אפים יוציא ריב