Read כֶּתֶר אֲרָם צוֹבָא - Tanah Aleppo Codex משלי 31 Bible Online

משלי 31 - כֶּתֶר אֲרָם צוֹבָא - Tanah Aleppo Codex bible

משלי 31

¹א דברי למואל מלך-- משא אשר-יסרתו אמו

²ב מה-ברי ומה-בר-בטני ומה בר-נדרי

³ג אל-תתן לנשים חילך ודרכיך למחות מלכין

⁴ד אל למלכים למואל--אל למלכים שתו-יין ולרוזנים או (אי) שכר

⁵ה פן-ישתה וישכח מחקק וישנה דין כל-בני-עני

⁶ו תנו-שכר לאובד ויין למרי נפש

⁷ז ישתה וישכח רישו ועמלו לא יזכר-עוד

⁸ח פתח-פיך לאלם אל-דין כל-בני חלוף

⁹ט פתח-פיך שפט-צדק ודין עני ואביון

¹⁰י אשת-חיל מי ימצא ורחק מפנינים מכרה

¹¹יא בטח בה לב בעלה ושלל לא יחסר

¹²יב גמלתהו טוב ולא-רע-- כל ימי חייה

¹³יג דרשה צמר ופשתים ותעש בחפץ כפיה

¹⁴יד היתה כאניות סוחר ממרחק תביא לחמה

¹⁵טו ותקם בעוד לילה--ותתן טרף לביתה וחק לנערתיה

¹⁶טז זממה שדה ותקחהו מפרי כפיה נטע (נטעה) כרם

¹⁷יז חגרה בעוז מתניה ותאמץ זרועתיה

¹⁸יח טעמה כי-טוב סחרה לא-יכבה בליל (בלילה) נרה

¹⁹יט ידיה שלחה בכישור וכפיה תמכו פלך

²⁰כ כפה פרשה לעני וידיה שלחה לאביון

²¹כא לא-תירא לביתה משלג כי כל-ביתה לבש שנים

²²כב מרבדים עשתה-לה שש וארגמן לבושה

²³כג נודע בשערים בעלה בשבתו עם-זקני-ארץ

²⁴כד סדין עשתה ותמכר וחגור נתנה לכנעני

²⁵כה עז-והדר לבושה ותשחק ליום אחרון

²⁶כו פיה פתחה בחכמה ותורת חסד על-לשונה

²⁷כז צופיה הילכות (הליכות) ביתה ולחם עצלות לא תאכל

²⁸כח קמו בניה ויאשרוה בעלה ויהללה

²⁹כט רבות בנות עשו חיל ואת עלית על-כלנה

³⁰ל שקר החן והבל היפי אשה יראת-יהוה היא תתהלל

³¹לא תנו-לה מפרי ידיה ויהללוה בשערים מעשיה {ש}