Read כֶּתֶר אֲרָם צוֹבָא - Tanah Aleppo Codex משלי 4 Bible Online

משלי 4 - כֶּתֶר אֲרָם צוֹבָא - Tanah Aleppo Codex bible

משלי 4

¹א שמעו בנים מוסר אב והקשיבו לדעת בינה

²ב כי לקח טוב נתתי לכם תורתי אל-תעזבו

³ג כי-בן הייתי לאבי רך ויחיד לפני אמי

⁴ד וירני--ויאמר לי יתמך-דברי לבך שמר מצותי וחיה

⁵ה קנה חכמה קנה בינה אל-תשכח ואל-תט מאמרי-פי

⁶ו אל-תעזבה ותשמרך אהבה ותצרך

⁷ז ראשית חכמה קנה חכמה ובכל-קנינך קנה בינה

⁸ח סלסלה ותרוממך תכבדך כי תחבקנה

⁹ט תתן לראשך לוית-חן עטרת תפארת תמגנך

¹⁰י שמע בני וקח אמרי וירבו לך שנות חיים

¹¹יא בדרך חכמה הריתיך הדרכתיך במעגלי-ישר

¹²יב בלכתך לא-יצר צעדך ואם-תרוץ לא תכשל

¹³יג החזק במוסר אל-תרף נצרה כי-היא חייך

¹⁴יד בארח רשעים אל-תבא ואל-תאשר בדרך רעים

¹⁵טו פרעהו אל-תעבר-בו שטה מעליו ועבר

¹⁶טז כי לא ישנו אם-לא ירעו ונגזלה שנתם אם-לא יכשולו (יכשילו)

¹⁷יז כי לחמו לחם רשע ויין חמסים ישתו

¹⁸יח וארח צדיקים כאור נגה הולך ואור עד-נכון היום

¹⁹יט דרך רשעים כאפלה לא ידעו במה יכשלו

²⁰כ בני לדברי הקשיבה לאמרי הט-אזנך

²¹כא אל-יליזו מעיניך שמרם בתוך לבבך

²²כב כי-חיים הם למצאיהם ולכל-בשרו מרפא

²³כג מכל-משמר נצר לבך כי-ממנו תוצאות חיים

²⁴כד הסר ממך עקשות פה ולזות שפתים הרחק ממך

²⁵כה עיניך לנכח יביטו ועפעפיך יישרו נגדך

²⁶כו פלס מעגל רגלך וכל-דרכיך יכנו

²⁷כז אל-תט-ימין ושמאול הסר רגלך מרע